Densaýlyq saqtaý ministri Eljan Birtanov zań aiasynda adam aǵzalaryn alý qalai júzege asyrylatynyn túsindirdi, dep habarlaidy Sputnik Qazaqstan.
"Bizdiń zań boiynsha ár azamat kózi tirisinde jazbasha túrde donor bolýdan bas tartsa, onda organdaryn almaidy. Basqa jaǵdaida eger jazbasha bas tartqany týraly qaǵaz bolmasa, ol adamnyń aǵzalaryn alýǵa zań júzinde ruqsat etiledi", - dedi Birtanov jýrnalisterge bergen suhbatynda.
Ministrdiń aitýynsha, búginde donordy kútip júrgen naýqastar kóp. Al qazirgi normanyń arqasynda biraz adamnyń ómirin saqtap qalýǵa bolady.
"Biraq keide týǵan-týystar sotqa beredi. Nege bizden ruqsat almai, aǵzany alasyz dep shaǵymdanady. Negizi, zań boiynsha ruqsat alýdyń qajeti joq. Adam tiri kezinde qarsy ekenin jazyp ketýi kerek. Mysaly, búginde tsifrovizatsiia aiasynda emhanaǵa tirkelgende ár azamatqa donor bolýǵa kelisesiz be, álde bas tartasyz ba dep usynys jasalady. Kóp azamattar kelisedi. Biz osyny paidalanyp, basqa adamdardyń ómirin saqtap júrmiz", - dep atap kórsetti Birtanov.
