Vitebskide ótken «Slavian bazary-2021» halyqaralyq óner festivaliniń gran-pri iegeri Rýhiia Baidúkenova Ortalyq kommýnikatsiialar qyzmetinde baspasóz máslihatyn ótkizdi, dep habarlaidy QazAqparat.
«Slavian bazarynyń» irikteýine úsh jyl qatarynan barǵanmyn. Alǵash barǵanda uiymdastyrýshylar maǵan «aryqta» dep aitty. Ol kezde salmaǵym 95 keli edi. Ekinshi ret barǵanymda da baǵym janbady, juldyzdy sátim bolmady. Úshinshi jyly irikteýge qatysý-qatyspaýdy oilap júrgende, Dimash Qudaibergen qatysyp kór dep usynys jasady. Osylaisha, Roza Rymbaeva bastaǵan ádil qazylar alqasy maǵan elimizdiń atynan óner kórsetýge joldama berdi», - dedi jas ánshi.
Sonymen birge, Rýhiia Baidúken «Slavian bazary-2021» baiqaýynyń qalai ótkenin aityp berdi.
«Qyz bala bolǵandyqtan árine, túr-kelbetimizge kóp mán beremiz. Baiqaýdyń birinshi kezeńinde bet-álpetim aziialyq bolǵandyqtan, stilister durys boiamady, shashym da asa unamady. Kóńil-kúiim túsip, ózim boiana bastadym. Oǵan qosa, baiqaýda daýsymdy kórsetpesem jeńiletinimdi uqtym. Ándi de ádil qazyǵa emes, halyqqa arnap aitý kerek. Jailylyq izdep, keýdeni qysatyn pidjakty, biik óksheli aiaq kiimdi sheship tastadym. Baiqaý ashyq aspan astynda uiymdastyryldy, sol kúni qatty jańbyr jaýdy. Abyroi bolǵanda, men shyqqanda jaýyn basyldy», - dep kúldi ánshi.
Sonymen birge, Vitebskidegi Dimashtyń sheteldik jankúierleri jas ánshige úlken qoldaý kórsetken.
«Onda taǵam jaǵynan qiyndyqtar boldy. Bir kúni sorpa izdegenimdi Dimashtyń jankúierleri estip, ertesine qonaqúige sorpa jasap ákeldi. Árine, mundai qamqorlyq kútpedim. Olar bizdiń kók týymyzdy kóterip, baiqaý boiy úlken qoldaý kórsetti. Dimash aǵa – maǵan ózimnen de qatty senim artyp, jeńiske jetetinime sendirgen adam. Mádeniet ministri Aqtoty Raiymqulova men Almaty oblysynyń ákimi Amandyq Batalovqa da úlken rahmet. Amandyq Ǵabbasuly saparǵa shyǵarda batasyn berip, «Seniń kóziń chempion» degen edi. Sol sózi de baiqaýda maǵan úlken demeý boldy. Árine, qoldaý kórsetken barsha qazaq eline alǵys aitamyn», - deidi Baidúken.
Ánshi jeńiske jetkende qandai sezimde bolǵanyn eske aldy.
«Konkýrstyń barlyq qatysýshylary sahna syrtynda upaiymyzdy sanap, eseptep júrdik. Menimen teń túsken serbiialyq ánshi qyz bolatyn. Sol qyzdyń upaiy belgili bolǵasyn, jeńgenime esh kúmán bolmady. Eń aldymen sahna syrtynda qatty qýanǵan tárizdimiz. Jalpy ózime syni qaraityn adammyn, emotsiiaǵa kóp berilmeimin. Alda vokaldyq deńgeiimdi taǵy da arttyrǵym keledi, sol úshin kúnde eńbektenemin. Jeke shyǵarmashylyǵymmen ainalysyp, án jazǵym keledi, klip túsirgim keledi, televiziialyq jobalarǵa qatysqym keledi. Ázirge barlyq usynystardy qarastyramyn jáne unamdysyn tańdaimyn», - deidi Rýhiia Baidúken.
Uiymdastyrýshylardyń aitýynsha, «Slavian bazary» baiqaýy biyl 30-shy ret ótti. 30 jylda qazaqstandyq qatysýshylar 15 júlde alǵan, onyń tórteýi – Bas júlde.
Aita keteiik, 14 memleketten kelgen qatysýshy slavian elinen shyqqan kompozitordyń týyndysyn slavian tobyna jatatyn tildiń birinde orkestrdiń súiemeldeýimen oryndady. Baiqaý nátijesinde jerlesimiz Gran-pri iegeri atanyp, «Altyn lira» músinshesimen birge 20 myń AQSh dollaryna ie boldy.
Rýhiia Baidúken 1998 jyly Taldyqorǵan qalasynda dúniege kelgen. Ol Qazaq Ulttyq óner ýniversitetinde «Estrada jáne vokal» mamandyǵynda oqidy. Onyń daýysy tórt jarym oktavaǵa jetedi.
Baiqaý jeńimpazy Rýhiia Baidúkendi Memleket basshysy Qasym-Jomart Toqaev arnaiy quttyqtady.
