17 tamyzda L.Gýmilev atyndaǵy Eýraziia ulttyq ýniversitetinde QR Prezidenti Ákimshiliginiń Basshysy – Ulttyq komissiianyń tóraǵasy Á.Jaqsybekovtiń tóraǵalyq etýimen Qazaqstan Respýblikasy Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń úshinshi otyrysy ótti.
Otyrys bastalǵanǵa deiin komissiia músheleri «Rýhani jańǵyrý» baǵdarlamasyn basqarý jónindegi keńseniń (Jobalyq keńse) jáne onyń janynda jumys isteitin Kommýnikatsiialyq ortalyqtyń qyzmetimen tanysty.
Jobalyq keńse «Rýhani jańǵyrý» baǵdarlamasynyń barlyq baǵyttary boiynsha kúlli ortalyq jáne jergilikti atqarýshy organdardyń qyzmetin úilestirýdi qamtamasyz etedi.
Jumysyn bastaǵannan beri Jobalyq keńse ministrlikter men ákimdikter usynǵan 1170 jobany pysyqtady, qazir olar júzege asyryla bastaldy.
Otyrysta Ulttyq komissiia músheleri «Rýhani jańǵyrý» baǵdarlamasyn iske asyrý barysyn qarady. Aqtóbe jáne Shyǵys Qazaqstan oblystarynyń ákimderi men jumys toptarynyń jetekshileri atqarylǵan jumystar jóninde esep berdi.
Jalpy alǵanda, qazaq tilin latyn álipbiine kóshirý jobasy boiynsha tiisti jumys toby aldaǵy kúzde jańa álipbidiń nusqasyn qaraýǵa usynatyn bolady.
Sarapshylar «Jańa gýmanitarlyq bilim. Qazaq tilindegi 100 jańa oqýlyq» jobasy aiasynda gýmanitarlyq pánder boiynsha 17 oqýlyqtyń tizimin jasady. Baǵdarlamanyń aiasynda qurylǵan Ulttyq aýdarma biýrosy olardy aýdarýǵa kiristi.
«Qazaqstannyń kieli jerleriniń geografiiasy» jobasy boiynsha respýblikalyq deńgeidegi 100 jáne óńirlik deńgeidegi 500 kieli nysan iriktelip alyndy.
«Jahandaǵy zamanaýi qazaqstandyq mádeniet» jobasy boiynsha úzdik týyndylardyń tizimi jasaldy.
Oǵan ádebiet salasyndaǵy 216, «teatr, kino jáne horeografiia» janryndaǵy 48, beineleý óneri boiynsha 182 jáne mýzyka salasyndaǵy 200-den astam shyǵarma engizildi.
Týyndylardy aldyn-ala irikteý qoǵamdyq talqylaýdy eskere otyryp jasalady. Odan keiin tizim onyń irikteý talaptaryna sáikestigin saraptaý úshin saraptamalyq toptarǵa usynylady.
«Qazaqstandaǵy 100 jańa esim» jobasyna 1500 ótinim kelip tústi, olardan ári qarai ashyq daýys berýge usynylatyn aralyq pýldar túziletin bolady.
***
Ulttyq komissiia Qazaqstan Respýblikasy Prezidentiniń Jarlyǵymen qoǵamdyq sanany jańǵyrtý baǵdarlamasyn júzege asyrý, eldiń ári qarai da dáiekti túrde mádeni-gýmanitarlyq damýyn qamtamasyz etý maqsatynda qurylǵan bolatyn.
Komissiia quramynda tanymal qoǵam qairatkerleri, ǵalymdar, jazýshylar, jýrnalister, Parlament depýtattary, Prezident Ákimshiliginiń ókilderi, Úkimet músheleri, óńirler men Astana, Almaty qalalarynyń ákimderi, Qazaqstan halqy Assambleiasynyń músheleri jáne saiasi partiialardyń ókilderi bar.
