Rýdnyi qalasynda jańadan salynǵan sholý dóńgeleginiń jumysy sot sheshimimen toqtatyldy, dep habarlaidy "Ult aqparat" oblystyq sottyń baspasóz qyzmetine silteme jasap.
Búgin Qostanai oblysynyń mamandandyrylǵan aýdanaralyq ekonomikalyq sotynda «Rýdnyi qalasy tutynýshylar quqyǵyn qorǵaý ortalyǵy» memlekettik mekemesiniń Rýdnyi qalasy ákimdiginiń qurylys bólimi, Rýdnyi qalasy ákiminiń apparaty, Qostanai oblysy ákimdiginiń memlekettik sáýlet-qurylys baqylaý basqarmasy, «AlataýGorStroi» JShS, «Elite Expert», «Retro-2» uiymdaryna qatysty talap aryzy boiynsha azamattyq is qaraldy. Aryz berýshi tarap Rýdnyi qalasyndaǵy «Sholý dóńgelegi» attraktsionyn paidalanýǵa tyiym salýdy ótingen.
Buǵan deiingi sot sheshimi boiynsha sot atalǵan attraktsiondy paidalanýdy ýaqytsha toqtatý týraly sheshim qabyldady. Qazirgi ýaqytta tiisti sot saraptamalaryn taǵaiyndaý máselesi tolyǵymen aiaqtaldy.
«Sot Rýdnyi qalasyndaǵy «sholý dóńgelegi» qurylǵysynyń 27.12.2018 jyly berilgen paidalanýǵa qabyldaý aktisin zańsyz dep taný týraly sheshim qabyldady jáne Rýdnyi qalasy ákimdiginiń qurylys bólimine jáne «AlataýGorStroi» JShS-ne «Dostyq» saiabaǵynda turǵan «sholý dóńgelegin» úsh ai ishinde bólshekteý mindeti júkteldi. Sot sonymen qatar Qostanai oblysynyń ákimine jáne Qostanai oblysynyń prokýroryna birqatar jeke uiǵarymdar shyǵardy. Taraptarǵa sot qabyldaǵan sheshimniń túsindirmesi berilip, ótkizilgen sot aktilerine shaǵymdaný quqyǵy túsindirildi», - dedi oblystyq sottyń baspasóz qyzmetindegiler.
Eske salsaq, Rýdnyi qalasynyń turǵyny sholý dóńgeleginiń durys ainalmai turǵanyna shaǵymdanyp, áleýmettik jelilerge beinejazba taratqan bolatyn. Alaida «AlataýGorStroi» JShS merdigerlik uiymynyń ókili Aleksandr Korenevtiń sózinshe, sholý dóńgelegi paidalanýǵa berilgen ýaqytta aqaýsyz jumys istegen.
