Foto: videodan skrinshot
Rýdnyi qalasyndaǵy kópqabatty turǵyn úidiń kireberesine kirip ketken jabaiy túlkini arnaiy qyzmet ókilderi óltirip alǵan, dep habarlaidy Ult.kz.
Qala ákimdiginiń málimetinshe, turǵyndardan túsken habardan keiin oqiǵa ornyna politsiia men arnaiy qyzmetter kelgen. Adamdardyń qaýipsizdigin qamtamasyz etý jáne aýrýlardyń taralý qaýpin eskere otyryp, janýardyń jaqyn mańdaǵy sýpermarket pen balabaqsha aýmaǵyna shyǵyp ketpeýi úshin podezd ben jertóle qorshaýǵa alynǵan.
Túlkini aýlaý "ustaý – sterilizatsiialaý – vaktsinatsiialaý – qaitarý” baǵdarlamasy aiasynda júrgizilgen.
“Mamandar uiyqtatatyn dári qoldaný arqyly túlkini áreketsiz kúige keltirýge áreket jasady. Alaida janýardyń jasy ulǵaiǵany jáne qatty álsiregeni saldarynan preparat kútkendei áser etpedi. Odan arǵy áreketter qoldanystaǵy biologiialyq jáne veterinariialyq normalarǵa sáikes júzege asyryldy”, – delingen ákimdik habarlamasynda.
Nátijesinde qatty álsiregen túlki uiyqtatatyn dáriniń áserine tótep bere almai, qaza tapty.
