Búginde Qazaqstandaǵy kólikterdiń 57 paiyzy otandyq zaýyttarda qurastyrylǵan. Bul týraly Qostanaidaǵy kólik qurastyrý jónindegi májiliste Indýstriia jáne infraqurylymdyq damý ministri Roman Skliar málim etti, dep habarlaidy QazAqparat.
Úkimet basshysy Asqar Mamin Qostanai qalasyndaǵy «SaryarqaAvtoProm» AQ bazasynda aýyl sharýashylyǵy taýar óndirýshilerimen kezdesti. Jiynda aýyl sharýashylyǵy tehnikalaryn shyǵarý isi men otandyq avtoóndiristiń damýy talqylandy. Indýstriia jáne infraqurylymdyq damý ministri Roman Skliar avtokólik shyǵarýdyń damýy men jetistikterine toqtaldy. Aitýynsha, az ǵana ýaqyt ishinde elimizde kólik qurastyrýdyń jańa baǵyty paida boldy. Investitsiialyq baǵdarlamalar qabyldana bastady. Jańa indýstriialandyrýdyń birinshi bes jyldyǵynyń qorytyndysynda avtomobil óndirisi óńdeý ónerkásibindegi eń qarqyndy damýshy sala retinde tanyldy.
«Qazaqstannyń avtomobil ónerkásibiniń tarihy jol talǵamaityn «Niva» jeńil kólik qurastyrýdan bastaý aldy. Munan keiin elimizde «SaryarqaAvtoProm», «SemAZ», «KAMAZ-Injiniring», «Hyundai Trans Auto», «Daewoo Bus Kazakhstan» sekildi avtokólik qurastyrý kásiporyndary paida boldy. Búginde Qazaqstan halyqaralyq ekologiialyq standarttarǵa sai keletin 167 kólik túrin qurastyrady. Onyń ishinde jeńil avtokóliktiń 39 túri shyǵady. Jalpy qazirgi Qazaqstannyń mashina jasaý salasyn kópsalaly dep aitýǵa bolady. Oǵan elektr quraldaryn, akkýmýliatorlar, stanoktar men túrli aspaptar, taý-ken, metallýrgiia, aýyl sharýashylyǵy qural-jabdyqtaryn, taǵy basqa da zattar shyǵarý kiredi. Eldegi kólikterdiń 57 paiyzy ózimizdiń zaýyttarda qurastyrylady. Avtoóndiristegi otandyq úles 50 paiyzǵa deiin jetti«, - dedi Roman Skliar.
Ministrdiń sózinshe, 2019 jyldyń 7 aiynda eldegi mashina zaýyttary 24 myńnan astam kólik shyǵarǵan. Jyl aiaǵyna deiin 60 myńnan astam avtokólik qurastyrylmaq.
»Jyl sońyna deiin balamasy joq injiniring ortalyǵy uiymdastyrylady. Onyń maqsaty – bilikti ári ámbebap kadr daiyndaý saiasatyn iske asyrý. Buǵan memleket tarapynan jan jaqty qoldaý kórsetiledi«, - dedi Indýstriia jáne infraqurylymdyq damý ministri.
Roman Skliar aitqandai, jańadan ashylatyn ortalyq mamandary avtokólik qurastyrýdyń zamanaýi tetikterin de úiretedi.
