QR Premer-Ministriniń orynbasary Roman Skliar jumys saparymen Tatarstan Respýblikasyna bardy, dep habarlaidy "Ult aqparat" primeminister.kz saityna silteme jasap.
Sapar aiasynda R.Skliar Tatarstan basshysy Rýstam Minnihanovpen kezdesti, sondai-aq World Urban Parks Dúniejúzilik park kongresine qatysty.
«Kongreste Avstraliia, Jańa Zelandiia, AQSh, Afrika, Eýropa jáne TMD elderinen 120-ǵa jýyq spiker sóz sóiledi jáne jalpy sany myńnan astam delegat qatysty. Qatysýshylar qoǵamdyq keńistiktiń damýyn, qazirgi zamanǵy megapolis ómirindegi jasyl aýmaqtardyń rólin jáne saiabaqtardyń qalalyq ortaǵa áserin talqylady», - delingen aqparatta.
Qazaqstandyq tarap eki eldiń ekonomikalyq ózara is-qimylyn damytýda mańyzdy ról atqaratyn kólik salasyndaǵy yntymaqtastyqtyń tabysty júzege asyrylyp jatqanyn atap ótti.
Kongress barysynda Qazaqstan men Resei Qoǵamdyq keńistikterdi qaita qurý salasynda birlesken tájiribelerdi damytý týraly memorandýmǵa qol qoidy.
Qujatqa sáikes, eki el yntymaqtastyǵynyń negizgi baǵyttary keńistikti uiymdastyrýǵa ekologiialyq kózqaras, jas sáýletshilerdiń kásibi qaýymdastyǵyn qalyptastyrý, qala turǵyndary men biznesti abattandyrý jobalaryna tartý, jergilikti qaýymdastyqtar men jergilikti óndiristerdi damytý, qoǵamdyq keńistikterdi basqarý jáne olardy ártúrli belsendilikpen tolyqtyrý bolady. Memorandým sheńberinde Resei men Qazaqstan qoǵamdyq keńistikter men qalalyq ortany damytýǵa baǵyttalǵan birlesken zertteýler men is-sharalar júrgizý kózdeidi.
