«Soiýz-MS» kóliktik kemesi bar «Soiýz-2.1a» jańa zymyran-tasyǵyshyn Baiqońyr ǵarysh ailaǵynan ushyrý synaǵy sátti ótti, dep habarlaidy QazAqparat tilshisi.
Roskosmos telestýdiiasy bortynda robot bar «Soiýz MS-14» kemesiniń Baiqońyr ǵarysh ailaǵynan ushyrylý sátin startqa jarty saǵat qalǵanda tikelei efirden kórsete bastady.
Osy ýaqyt ishinde tikelei efir qatysýshylary «Soiýz MS-14» ǵarysh kemesiniń ushýǵa daiyndyǵy, «Soiýz-2.1a» zymyran-tasyǵyshynyń qurylý tarihy jáne reseilik alǵashqy adamtektes «Fiodor» roboty týraly videony tamashalady.
Belgili bolǵandai, «Soiýz-2.1a» alǵash ret 2004 jyly ushyrylǵan. «Soiýz» reseilik zymyrany búgingini qosqanda 1910 ret ǵaryshqa jiberilgen.
Ushyrylym belgilengen ýaqytta – 2019 jyldyń 22 tamyzynda, Nur-Sultan qalasynyń ýaqytymen 09 saǵat 38 minýtta ótti. Reportaj júrgizýshiniń habarlaýynsha, barlyǵy shtattyq rejimde ótken. Áýege kóterilgennen keiin onynshy minýtta ǵarysh kemesi zymyran-tasyǵyshtan bólinip, «Soiýz MS-14» orbitaǵa shyqqan.
Ǵarysh kemesiniń bortynda, komandirdiń ornynda reseilik robot Fedor otyr. Oǵan Skybot F-850 aty berilgen. «Soiýz-2.1a» zymyran-tasyǵyshy ushyrylar aldynda robot ushý aldyndaǵy daiyndyq týraly baiandady. «Kettik!» pármenin aitýdy da umytqan joq. 10 minýt boiy ushýdyń parametri men baiqaǵan jaǵdailar týraly kommentarii bildirip otyrdy.
«Ortalyq mashina qurastyrý ǵylymi-zertteý institýty Ushýdy basqarý ortalyǵynyń aqparaty boiynsha, «Soiýz MS-14» kemesiniń Halyqaralyq ǵarysh stansasyna (HǴS) jaqyndaýy jáne túiisýi eki táýliktik keste boiynsha júzege asady. Túiisý Nur-Sultan ýaqytymen 2019 jyldyń 24 tamyzynda 11 saǵat 30 minýtqa josparlanǵan.
