Oblys ákimi Danial AHMETOV bir kúndik jumys saparymen Ridder qalasynda bolyp, kenshiler shaharyndaǵy birqatar áleýmettik nysandardyń qurylysyn aralady. Turǵyndardy jeke máselelerimen qabyldap, týrizmdi, aǵash óńdeýdi damytý, taýarly-sút fermasyn qurý boiynsha ridderlikter qolǵa alǵan jańa jobalarmen tanysty.
Aimaq basshysy aldymen at basyn elektr qýatyn óndiretin «LK GES» JShS-ne buryp, eńsesin qaita tiktegen baiyrǵy kásiporynnyń búgingi tynys-tirshiligimen tanysty. Qazir júzge tarta adamdy jumyspen qamtyǵan Úlbi ózenindegi gidroqurylymdy qalypqa keltirý jumystary qyzý júrip jatyr.
Kásiporyn basshysy Dmitrii Boiarinovtyń aitýynsha, bul jerde negizinen elektr qýaty óndirilip, ekinshi sý qoldanýshylarǵa sý berý qyzmeti kórsetiledi. Jaýapkershiligi shekteýli seriktestiktiń aldaǵy josparyna qarai jyl sońyna deiin eki týrbina iske qosylmaq. Olardan jiyny 24 mVt elektr energiiasy óndiriledi dep kútilýde. Mekeme byltyr 723 mln. teńgeniń ónimin óndirgen. Oblys basshysy óz kezeginde kórsetkishti arttyrýdy jáne turǵyndarǵa sapaly qyzmet kórsetýdi tapsyrdy.
Danial AHMETOV Ridderdegi «Qazaq orman sharýashylyǵy jáne agroormanmelioratsiia ǵylymi-zertteý institýty» JShS Altai filialynda da boldy. Atalǵan filial direktory Andrei Kalachev 1959 jyldan qyzmeti bastalatyn, burynǵy Altai orman tájiribe stantsiiasynyń murageri bolyp tabylatyn Altai filialynyń negizgi qyzmeti óńirdegi orman sharýashylyǵyn jáne agroormanmelioratsiiany ǵylymi turǵyda zertteý ekendigine toqtaldy. Filial bazasynda aimaq basshysyna jergilikti kásipkerlerdiń aǵash óńdeý salasyndaǵy jańa jobalary tanystyryldy. Máselen, jeke kásipkerler N.Grigorev, A.Tsykýnov, F.Ivanov jáne «Ridderskii DOK» JShS ókilderi ekinshi, úshinshi surypty aǵash qaldyqtaryn tereń óńdeý, qaldyqsyz óńdeý, aǵashtan túrli buiymdar jasaý, «OSB» taqtaishalaryn óndirý jobalaryn oblys basshysynyń aldyna tartty. Alaida, olardyń barlyǵy da jobalaryn iske asyrý jolynda memlekettiń qoldaýyna zárý. Al bankter nesie berý úshin laiyqty kepildik múlik talap etedi. Osyǵan qatysty óz oiyn bildirgen Danial AHMETOV aǵash óńdeý jobalaryn qolǵa alǵanda, eń birinshiden daiyndalǵan ónimdi ótkizý naryǵyn ábden zerdelep alýdy, biznes-josparlardy nesie berýshilerdiń seniminen shyǵatyndai etip shynaiy ázirleýdi tapsyrdy.
Áleýmettik máseleler sheshimin taýyp keledi
Danial AHMETOV Michýrin kóshesiniń boiynda salynyp jatqan 280 oryndyq balabaqshanyń qurylysymen de tanysty. Bul nysan da uzaqqa sozylǵan qurylystardyń qatarynda. Esterińizde bolsa, oblys basshylyǵy atalǵan nysanǵa bólingen qarjyny qaitaryp alyp, ózge qurylystarǵa jumsaý máselesin de kótergen edi. Alaida, balabaqshanyń qurylysyn jalǵastyrǵan jergilikti jańa merdiger kompaniia «Shyǵysstroiindýstriia» JShS direktory Vladimir Startsev jyldyń sońyna deiin tapsyrýǵa ýáde berip otyr. Qazir 150 adam jumys istep jatsa, alda olardyń sany eki esege deiin artpaq. Al qala ákimi Jomart Muratovqa qurylysty úzbei baqylaýǵa alý júkteldi.
Ridder qalasyna jumys saparynyń aiasynda aimaq basshysy «Nur Otan» partiiasynyń qalalyq filialynda azamattardy jeke máseleleri boiynsha qabyldady. Qabyldaýǵa aldyn ala jazylǵan eki turǵynnyń máselesi de jeke bastyń qamynan góri áleýmettik mańyzǵa ie bolyp shyqty.
Aldymen qabyldaýǵa kirgen Maira Shákirqyzy Úlbi ózeni kóktemgi sý tasqyny kezinde jaǵalaýǵa jaiylyp, Ýlbastroi kentiniń turǵyn baspanalaryna, «Qazaqstan» saiajai birlestigine, Ridder men «Leninogorskii» demalys bazasy aralyǵyndaǵy jolǵa qaýip tóndiretinin másele etip kóterdi. Al Grigorii Nagovitsyn «Almaty – Zashita» baǵytyndaǵy jolaýshylar poiyzy Óskemen qalasyna keshki saǵat 20.44 kezinde keletinin, ondaǵy Ridderge baratyn jolaýshylar oblys ortalyǵynan 19.00-de attanyp ketetin sońǵy avtobýsqa úlgermeitindigin, atalǵan poiyzdyń marshrýtyn Almatydan Leninogorsk stantsiiasyna deiin uzartý qajettiligin jetkizdi.
Kóterilgen máselelerdi muqiiat tyńdaǵan oblys basshysy birinshi problemany sheshý úshin arnaiy komissiia qurylatyndyǵyn aitty. Sol komissiianyń sheshimine sáikes tiisti jumystar atqarylatyn bolady. Al poiyzdyń marshrýtyn uzartýdy qarastyrý oblystyq jolaýshy kóligi jáne avtomobil joldary basqarmasynyń basshysy Berik Beisekenovke tapsyrdy.
Sondai-aq, bul kúni oblys ákimi Ridder qalasyndaǵy turǵyn úi qurylysy boiynsha da sala mamandarynyń qatysýymen jiyn ótkizdi. Banktiń oblystyq filialynyń direktory Ainur Meiirbaevanyń aitýynsha, Ridder qalasyndaǵy banktiń 800-ge tarta salymshysynyń 300-i bank arqyly baspana alýǵa tolyq qabiletti. Sonymen birge ridderlikterdiń jalaqysy oblys boiynsha eń joǵary bolyp sanalady eken.
Qala ákimi Jomart Muratov qazirgi kezde 60 páterlik toǵyz baspananyń jobalyq-smetalyq qujattamalary daiyn ekendigin jetkizdi. Qarjy bolsa, sonyń ekeýin kelesi jyly bastap ketýge múmkindik bar. Jiyn qorytyndysy boiynsha 2017 jylǵa eki úidiń qurylysy úshin oblystyq biýdjetten qarjy bólýge sheshim qabyldandy. Páterler «Qazaqstannyń turǵyn úi-qurylys bankiniń» jelisi boiynsha tapsyrylmaq. Al qala ákimine qurylysty sapaly júrgizetin merdigerdi taýyp, barlyq protsedýralardy oidaǵydai uiymdastyrý kerektigi aityldy.
Budan keiin Ridderdegi hokkei modýlin sport modýline beiimdep qaita qurylymdaý jumystarymen tanysqan oblys basshysy merdiger mekeme «BEKI» JShS basshysyna sport nysanynyń edenin sapaly etip qaita jasaýdy tapsyrdy. Sebebi, blok kirpishterdiń ústine bekitýsiz ornatylǵan eden biraz ýaqyttan soń syr berýi ábden múmkin. Munda da qala basshylyǵyna nysan jyl sońynda qoldanysqa berilgenshe úzdiksiz baqylaýǵa alý tapsyryldy.
Oblys ákimi Danial AHMETOV Ridder qalasyna jumys sapary kezinde «S.N.Dýdkin» sharýa qojalyǵynyń 400 basqa arnalǵan taýarly-sút fermasynyń bazasynda Ridder qalasyna qarasty sharýashylyqtardyń taýarly-sút fermalaryn qurý, mal bordaqylaý, aýylsharýashylyq ónimderin óndirý jobalarymen tanysty.
Bul kúngi jumys saparynyń sońǵy nysany retinde oblys ákimi Ridderdegi «Sinegore» demalys bazasyna toqtap, munda arnaiy uiymdastyrylǵan oblysta týrizmdi damytý boiynsha qolǵa alynǵan jobalardy aralap kórdi. Sonyń ishinde almatylyq kásipkerler qolǵa alyp otyrǵan «Arman Village» jobasy boiynsha biznes-jospar quryp, ony qarastyrýdy tiisti oblystyq basqarmaǵa tapsyrdy.
– Oblystyń, onyń ishinde Ridderdiń týristik áleýeti óte úlken. Oǵan Almatydan ózge de óńirlerden kásipkerler qyzyǵýshylyq tanytyp otyr. Jaqynda Qytaidyń kórshiles óńirlerimen bul baǵytta mańyzdy kelissózder júrgizetin bolamyz. Qytailyq týrister toby buǵan deiin Úrjar, Zaisan aýdandarynda, Óskemen qalasynda bolyp ketti. Olar da osynda jobalar iske asyrýǵa yntaly. Qalada turǵyn úi alýǵa qyzyǵýshylyq joǵary. Ony biz bankpen birlese otyryp iske asyramyz. Qalada qurylystyń qarqyn alǵany qýantady. Balabaqsha, sport modýli qurylysy biyl aiaqtalady. Keler jyly qaladaǵy segiz mektepke jóndeý jumystary júrgiziledi. Qysqa ázirlik te oidaǵydai júrgizilip jatyr. Kóp jumysty qajet etse de, aýylsharýashylyq salasy alǵa basyp keledi. Salalyq jobalarǵa qoldaý kórsetiletin bolady. Bul rette qala basshylyǵy óz mindetterin oidaǵydai atqaryp otyr, - dedi jumys saparyn qorytyndylaǵan oblys ákimi Danial AHMETOV.
Dáýren Allabergenuly
"Didar" gazeti
