© Sputnik / Abzal Kaliev
Shyǵys Qazaqstan oblysyndaǵy Ridder qalasynda qoqys tógýge shyqqan balany konteinerler turǵan jerde kólik basyp ketken. Qazirgi kezde neirohirýrgtar 10 jastaǵy Nikitanyń ómirin saqtap qalýǵa tyrysyp jatyr.
Bul oqiǵa ótken jeksenbi kúni bolǵan. Mitsubishi markaly jol talǵamaityn kólik mingen 35 jastaǵy júrgizýshi balany basyp ketken. Noks.kz basylymyna suhbat bergen Nikitanyń ákesi oqiǵanyń mán-jaiyn aityp berdi, dep habarlaidy Sputnik Qazaqstan.
"Sol kúni saǵat 12 kezinde ulyma qoqys tógip kelshi dedim. Al qoqysty laqtyrý úshin joldyń arǵy jaǵyna ótýdiń qajeti de joq. Sebebi konteiner dál úidiń janynda ornalasqan. Balam dál sol konteinerler alańynda turǵanda ony djip soqqan", - deidi ol.
Soqqynyń qatty bolǵany sonsha, temir jáne beton tosqaýyl qirap qaldy. Al konteiner birneshe metrge ushyp ketken. Kýágerler balany kúl-qoqystyń arasynan shyǵaryp aldy. Balanyń telefonyn qoldy qylǵan adamdar da bolǵan. Artynan smartofonmen bailanys úzildi. Bireýler ony sóndirip tastapty.
"On minýttan keiin Nikita kelmegen soń men onyń mobildi telefonyna qońyraý shaldym. Gýdok baryp turǵan. Biraq eshkim almady. Ulym balalarmen oinap ketti dep oiladym da, qoia saldym. Artynan úige politseiler keldi. Olar ulymnyń qaltasyndaǵy kiltke qarap, úidiń nómirin bilgen", - deidi Nikitanyń ákesi.
Qalalyq aýrýhanada oǵan "bas súiek-mi zaqymy" degen diagnoz qoidy. Sol kúni Ridderge oblys ortalyǵynan neirohirýrgtar kelgen. Olar balanyń ómirine qaýip tónip turǵanyn aitty. Sebebi miy isip ketti. Óskemen qalasyndaǵy arnaiy bólimge de ázirshe tasymaldaýǵa bolmaidy.
Qazirgi kezde oqýshy bala es-tússiz jatyr. Ol jasandy jeldetý apparatyna qosyldy. Al tamaqty zond arqyly berip otyrady.
Kólik júrgizýshisine qatysty Qylmystyq kodekstiń 345-baby, 2-tarmaǵy (Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy, abaisyzda adamnyń densaýlyǵyna aýyr ziian keltirýge ákep soqqan is-áreket) boiynsha sotqa deiingi tergeý bastaldy.
Oǵan sáikes, belgili bir laýazymdardy atqarý nemese belgili bir qyzmetpen ainalysý quqyǵynan úsh jylǵa deiingi merzimge aiyra otyryp, 2 000 ailyq eseptik kórsetkishke (5 834 000 teńge) deiingi mólsherde aiyppul salý nemese sol mólsherde túzeý jumystary, ia bolmasa, 600 saǵatqa deiingi merzimge qoǵamdyq jumystarǵa tartý ne 2 jylǵa deiingi merzimge bas bostandyǵyn shekteýge nemese sol merzimge bas bostandyǵynan aiyrý jazasy qarastyrylǵan.
