Resei Qorǵanys ministrliginiń Mi-8 tikushaqtary Krasnoiar ólkesi men Irkýtsk oblysyndaǵy órtti sóndirýge kiristi, dep habarlaidy QazAqparat.
Juma kúni Resei qorǵanys vedomstvosy habarlaǵandai, tikushaqtar tabiǵi órtpen kúresý úshin kún saiyn 10-15 reis jasaidy.
Budan buryn habarlanǵandai, áskeri vedomstvo RF prezidenti Vladimir Pýtinniń tapsyrmasy boiynsha Il-76 markaly 10 ushaq pen Mi-8 markaly 10 tikushaqtan quralǵan aviatsiialyq top jasaqtady. Olar Krasnoiar ólkesindegi órtti sóndirýge kómektesedi.
«Órtti sóndirýge tartylǵan barlyq tikushaqtar kólemi 5 tonna bolatyn VSÝ-5 sý shashý qurylǵysymen jabdyqtalǵan», - delingen habarlamada.
Federaldyq «Avialesoohrana» deregi boiynsha, 1 tamyzdaǵy jaǵdaiǵa sáikes Reseide aýmaǵy 116089 gektarlyq 165 orman órti sóndirilip jatyr. Kúrdeli aýmaqtarda 2,9 mln gektar orman janyp jatyr. Órttiń kólemdi sharpyǵan aýmaǵy – Iakýtiiada. Onda 1,2 mln gektar taiga, Krasnoiar ólkesinde – 1,1 mln gektar jáne Irkýtsk oblysynda – 700 myń gektar otqa oranǵan. Orman órtin sóndirýge 2,9 myń adam, 420 tehnika, 48 áýe kemesi jumyldyryldy.
Orman órtine bailanysty RF tórt sýbektinde - Irkýtsk oblysy men Krasnoiar ólkesiniń barlyq aýmaǵynda, Býriatiia men Iakýtiianyń bir aýdanynda TJ rejimi engizildi.
Sibirdegi orman órtiniń tútini Qazaqstandaǵy jeti oblysty basty. Alaida QR IIM Tótenshe jaǵdailar komitetiniń tóraǵasy Vladimir Bekker Reseidiń Sibir aýmaǵyndaǵy órttiń taralýy Qazaqstanǵa qaýip týdyrmaitynyn málim etti.
Aita keteiik, buǵan deiin Donald Tramp Vladimir Pýtinge Sibirdegi orman órtin óshirýge kómek usynǵan bolatyn.
