QR Densaýlyq saqtaý ministrligi maman tapshylyǵyn joiý úshin rezidentýrǵa memlekettik grant bólý tásilin ózgertti. Bul týraly atalǵan vedomstvodan málim boldy, dep habarlaidy QazAqparat.
«Biyl qalalar men aýyldardaǵy meditsinalyq kadrlarǵa degen suranysqa qarai 18 mamandyq iriktep alyndy. Osy mamandyqtar boiynsha 2019-2020 oqý jylynda rezidentýraǵa memlekettik grant bólý josparlanýda. Biyldan bastap rezidentýra mamandyqtarynyń tizimi densaýlyq saqtaý júiesiniń jáne turǵyndardyń qajettiligine qarai jasalady», - delingen ministrlik málimetinde.
Máselen, rezidentýrada «Otbasylyq meditsina» degen jańa mamandyq ashyldy. Mindetti áleýmettik meditsinalyq saqtandyrý (MÁMS) engizilgennen keiin, Meditsinalyq-sanitariialyq alǵashqy kómek (MSAK )júiesi boiynsha kásiparalyq komandanyń ornyn otbasylyq dáriger almastyrýy tiis. Bul mamandardyń mindeti men jalaqysyna da áser etedi. Otbasylyq dáriger kez kelgen jastaǵy jáne kez kelgen patsientke jedel, sapaly meditsinalyq kómek kórsetedi.
Aldaǵy eki jylda rezident-túlekterdiń esebinen birqatar mamandyqtarǵa (akýsherlik-ginekologiia, pýlmonologiia, oftalmologiia, otolaringologiia, kardiologiia, kardiohirýrgiia, neirohirýrgiia, sporttyq meditsina, allergologiia, gematologiia) degen tapshylyq joiylady dep josparlanýda.
Álemde rezidentýra bilimi - tájiribege negizdelgen. Sondyqtan rezidentýradaǵy oqý kóbine aýrýhana, emhanada ótedi. Osyǵan bailanysty rezidentýraǵa daiyndyqtyń formaty jańartyldy. Endi oqý tikelei jumys ornynda ótedi. Túlekterdiń bolashaq qyzmet etetin jerin aldyn ala belgilep, birden jumysqa ornalasýyna kepildik berý josparlanýda. Rezidentýraǵa túsken adam oqý orny jáne Densaýlyq saqtaý basqarmasymen úsh jaqty shart jasaýy tiis.
Rezidentýra boiynsha memlekettik grant bólýdiń jańa ádistemesi sapaly kadr daiyndaýǵa áser etedi. Sondai-aq, rezidentti jumysqa ornalastyrý máselesi de sheshiledi. Al memlekettik bilim grantynyń konkýrstyq irikteýinen ótpegen túlekter óńirlerdegi jergilikti atqarýshy organdardyń tapsyrysy boiynsha rezidentýraǵa túse alady. Bul sharalar aýyl men qaladaǵy kadr tapshylyǵyn joiýǵa, memlekettik grantpen oqyǵandardyń keminde 3 jyl aýylda jumys isteýine múmkindik beredi.
Esterińizge sala keteiik, meditsina kadrlaryn josparlaý jáne rezidentýraǵa memlekettik bilim grantyn bólý QR Densaýlyq saqtaý ministrliginiń quzyretine kiredi. 2016 jyldan bastap jyl saiyn rezidentýraǵa memlekettik tapsyrys boiynsha 1500 oryn bólinedi.
