Kinokartina QR Mádeniet jáne sport ministrliginiń tapsyrysy boiynsha «Ulttyq kinony qoldaý memlekettik ortalyǵy» KEAQ qoldaýymen túsirilgen.
Kinokartina QR Mádeniet jáne sport ministrliginiń tapsyrysy boiynsha «Ulttyq kinony qoldaý memlekettik ortalyǵy» KEAQ qoldaýymen túsirilgen.
Filmde kúlli qazaqtyń qasireti bolǵan «Semei poligony» qurbandarynyń taǵdyry iadrolyq jarylystan zardap shegip, qos aiaqsyz dúniege kelgen azamattyń ómiri arqyly beinelenedi.
Jarynan aiyrylǵan jalǵyzbasty áke men jarymjan ákesine janashyr, qamqor bola bilgen balanyń kúibeń tirshiligi arqyly rejisser 1980-90 jyldardaǵy halyqtyń jaǵdaiyn kórsetedi.
Kórkem filmniń túsirilimi Abai oblysy, Aiagóz aýdany, Shyńǵoja aýylynda ótken.
Atap óterligi, kartinada basty róldegi Melis atty keiipkerdi kásibi akter emes, rasynda eki aiaǵynan aiyrylǵan qyzylordalyq azamat – Orynbek Shaimaǵanbetov somdaidy.
Al Melistiń mektep qabyrǵasynda oqityn uly – Jalǵastyń rólin Almaty oblysy Qarasai batyr atyndaǵy mekteptiń 6 synyp oqýshysy Arnur Akram oinaidy.
Sondai-aq, qosalqy rólderde belgili akterlar Erbolat Álqojaev, Beinur Baimuhambetov, Erlan Malaev, Aibek Imanqulov, Aiǵanym Nursultan boi kórsetedi.
Filmniń túsirilim kezeńi 2022 jyldyń qazan aiynda aiaqtalyp, 2023 jyldyń naýryz aiynda montaj kezeńi bastaldy. Maýsym aiynyń sońyna deiin sozylǵan montaj kezeńinde filmniń túsi óńdelip, qaita dybys jazý, kompiýterlik grafika, dybys árleý jumystary júrgizildi. Filmniń sońǵy nusqasy Memlekettik Ulttyq Kinony qoldaý ortalyǵynyń ekspertti keńes ókilderine 26-maýsym kúni kórsetilip, bekitildi. Aldaǵy ýaqytta film kórermenderge halyqaralyq kinofestivalder arqyly jol tartpaq.
Aita keterligi, filmniń rejisseri jáne stsenarii avtory – Kenjebek Shaiqaqov 2014 jyly «Amanat kz» prodiýserlik ortalyǵynyń qarjylandyrýymen «DSfilm» kinostýdiiasynda debiýttik «Kúrkó» atty filmin túsirdi. Atalǵan kinokartina sol jyly Dýshanbe qalasynda ótken halyqaralyq «Didor» kinofestivalinde júldeli orynǵa ie boldy. 2015 jyly Reseidiń Chita qalasynda ótken «Baikal aimaǵy» halyqaralyq kinofestivalinde «Ádilqazylardyń arnaiy júldesi» nominatsiiasymen marapattaldy. 2015 jyly Iakýtskde ótken halyqaralyq kinofestivalde «Eń úzdik rejisserlik debiýt» nominatsiiasymen marapattaldy. Sol jyly Almaty qalasynda ótken tuńǵysh qazaqstandyq «Synshylar tańdaýy» kinomarafonynda «Jyldyń úzdik stsenariii» júldesin aldy. Sol jyly Avstraliianyń Brisban qalasynda Aziia jáne tynyq muhity aimaǵy kinoakademiiasynyń «ARSA» kinofestivalinde «Úzdik stsenarii» nominatsiiasy boiynsha qatysty.
