Qazaqstanda reisi keshikken áýe kompaniialarynyń jolaýshylarǵa tóleitin aiyppulyn ulǵaitý máselesi qaralyp jatyr. Bul jaiynda Májilis depýtattarynyń saýalyna Premer-Ministrdiń birinshi orynbasary Roman Skliardyń jaýabynda aitylǵan, dep habarlaidy QazAqparat.
«Qazaqstan Respýblikasynda ushý turaqtylyǵynyń kórsetkishi 2021 jyly shamamen 82 paiyzdy qurady. Bul rette Eýropalyq odaq elderi men AQSh kórsetkishteri tiisinshe 77 jáne 80 paiyzdy quraidy. Sonymen qatar, qoldanystaǵy zańnama áýe kompaniiasynyń kinásinen reisterdiń keshigýi nemese bolmaýy kezinde usynýǵa mindetti qyzmetterdi kózdeidi. Budan basqa, tasymaldaýshy keshiktirýdiń ár saǵaty úshin bilet qunynan 3 paiyzy mólsherinde aiyppul tóleidi.
Bul rette, reisterdiń keshigýi kezinde jolaýshylardyń quqyqtaryn qorǵaý maqsatynda jolaýshylarǵa tólenetin aiyppul mólsherin ulǵaitý máselesi qaralýda. Reister keshiktirilgen kezde jolaýshylar aldyndaǵy óz mindetterin oryndamaǵan jaǵdaida, áýe kompaniiasy aiyppul túrinde ákimshilik jaýapkershilikke tartylady», - delingen Roman Skliardyń jaýabynda.
Onyń dereginshe, 2021 jyly reistiń keshigýi kezinde zańnamada kózdelgen qyzmetterdiń kórsetilmeýine bailanysty tasymaldaýshyny ákimshilik jaýapkershilikke tartýdyń 3 jaǵdaiy tirkeldi.
«Sonymen qatar, 2021 jyly áýe keńistiginde oryndalǵan turaqty reisterdiń sany ótken jylmen salystyrǵanda 36 paiyzǵa ósti. Bul rette oryndalǵan sýbsidiialanatyn áýe reister sany 4 365 reisti nemese jalpy reisterdiń 6 paiyzyn qurady», - dedi birinshi vitse-premer.
