Almaty qalasynyń qoǵamdyq densaýlyq basqarmasynyń basshysy Nariman Tabynbaev brifing barysynda qaladaǵy ózge vaktsinalar tiimdiligi jaǵynan Pfizer-den kem túspeitinin aitty, dep habarlaidy QazAqparat.
Spiker ekpe naýqanynyń qarqynyn omikron kelgenge deiin arttyrý kerektigin de jetkizdi.
«Qarasha aiynda Densaýlyq saqtaý ministrliginiń ókili bizdiń departamentke Pfizer vaktsinasy aqyly bolsa, qaladaǵy shamamen suranysty anyqtaýdy tapsyrdy. Sondyqtan emhanalarda aldyn ala jazylý júrgizildi. Ministrlikpen kúnde sóilesemiz, ókinishke qarai, búgingi kúni aqyly egý úshin Pfizer vaktsinasy qashan túsetini, onyń sany men quny áli anyqtalǵan joq. Sondyqtan qańtar, aqpan ailarynda vaktsinatsiia bolady dep aita almaimyz. Búgingi kúni qalada bar vaktsinamen revaktsinatsiia jasaýdy usynamyz, olar bizde jetkilikti. Men qalalyqtarǵa Pfizer vaktsinasyn kútpeńizder dep keńes berer edim», - dedi Nariman Tabynbaev.
Sondai-aq ol qalada aqyly ekpe alǵysy keletinderdi tirkeý áli de jalǵasyp jatqanyn aitty.
«Emhanalarda vaktsinany aqyly túrde alǵysy keletinder tizimi jasalyp jatyr. Búginde aqyly vaktsinatsiiaǵa arnalǵan Pfizer preparaty joq, men turǵyndardy qolda bar QazVac jáne Vero Cell vaktsinasyn qaita salýǵa shaqyramyn, olar tiimdiligi jaǵynan esh kem túspeidi», – dep atap ótti spiker.
