QR Qarjy ministri Erulan Jamaýbaev Májiliste 2021 jylǵa arnalǵan respýblikalyq biýdjetti naqtylaý týraly Zań jobasyn túsindirdi, dep habarlaidy QazAqparat.
Naqtylaý «Nur Otan» partiiasynyń sailaýaldy baǵdarlamasyn, Memleket basshysynyń strategiialyq bastamalary men tapsyrmalaryn qarjylyq qamtamasyz etýge, sondai-aq COVID-19-ben kúresýge baǵyttalǵan.
«2021 jylǵa arnalǵan respýblikalyq biýdjettiń parametrlerine mynadai ózgerister engizildi. Respýblikalyq biýdjet túsimderi 1,1 trln teńgege ulǵaiyp, 12,6 trln teńgeni quraidy. Biýdjet tapshylyǵy jalpy ishki ónimge 3,5% deńgeiinde boljanyp otyr, iaǵni 149 mlrd teńgege ósken», - dedi ministr Májilistiń jalpy otyrysynda.
Onyń aitýynsha, respýblikalyq biýdjet shyǵystarynyń kólemi 1,3 trln teńgege artyp, 15,3 trln teńgeni quraidy.
«Naqtylaý jobasynda qarajatty mynadai baǵyttar boiynsha bólý kózdelgen. Birinshi, «Nur Otan» partiiasynyń sailaýaldy baǵdarlamasyn iske asyrý – jalpy somasy 884 mlrd teńge. Osy qarajat esebinen jol salý jáne rekonstrýktsiialaý, agroónerkásip keshenin damytý, halyqtyń turǵyn úi jaǵdaiyn jaqsartý, taza aýyz sýmen qamtamasyz etý jáne «Aýyl – El besigi» arnaiy baǵdarlamasy sheńberinde aýyldardy jańǵyrtý boiynsha sharalar qabyldanady.
Ekinshi, koronavirýs infektsiiasymen kúres boiynsha epidemiiaǵa qarsy is-sharalardy qarjylandyrýǵa 265 mlrd teńge qarastyrylǵan.
Úshinshi, Memleket basshysynyń tapsyrmalaryn jáne buryn qabyldanǵan mindettemelerdi oryndaý. Biýdjetti naqtylaý nátijesinde onyń áleýmettik baǵyttylyǵy saqtalǵan, al naqty sektor men óńirlerdi qoldaý kúsheitildi. Bul týraly biýdjet shyǵystarynyń qurylymy kórsetip otyr», - dep atap ótti E. Jamaýbaev.
Qarjy ministri onyń 723 mlrd teńge somasynda edáýir úlken bóligi ekonomikanyń naqty sektoryn qoldaýǵa baǵyttalǵanyn aitty.
«Bul baǵytty yntalandyrý orta merzimde eldiń damýyna mýltiplikativtik áser etetin bolady. Nátijesinde osy salanyń shyǵystary 2,4 trln teńge nemese jalpy shyǵystar kóleminiń shamamen 16% kóleminde josparlanyp otyr. Biýdjettiń áleýmettik salasy jalpy alǵanda 374 mlrd teńgege ulǵaiyp, 7,5 trln teńgeni nemese jalpy shyǵystardyń 48,7% quraidy. Kúsh qurylymy shyǵystary 211 mlrd teńgege ósip, 1,6 trln teńge somasynda josparlanǵan.
Jalpy memlekettik shyǵystar 80 mlrd teńgege qysqartylyp, 3,3 trln teńgeni quraidy. Bul blok shyǵystarynyń azaiýy Prezidenttiń bastamalaryna arnalǵan rezervti qaita bólýmen bailanysty. Qosymsha shyǵystardyń aitarlyqtai úlesi nysanaly transferttermen óńirlerge beriletinin atap ótý qajet. Olardyń jalpy somasy 539 mlrd teńge bolsa, onyń ishinde damýǵa arnalǵan transfertter – 335 mlrd teńge», - dep túsindirdi ministr E. Jamaýbaev.
Aita keteiik, Májiliste «2021-2023 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister men tolyqtyrýlar engizý týraly» QR Zań jobasy qaralyp jatyr.
