25 qazan – Respýblika kúnine orai Túrkistanda Memlekettik Týdy resmi kóterý rásimi ótti. «Rámizder alańynda» uiymdastyrylǵan patriottyq is-sharaǵa qala turǵyndary men qonaqtary, jalyndy jastar qatysty. Oblys ákimi Darhan Satybaldy da arnaiy qatysyp, kók Týdyń mártebesin kóteretin bastamaǵa úles qosty.
Aldymen Ánuran shyrqalyp, ol otanshyldyq baǵyttaǵy ánderge ulasty. Oblys ónerpazdary rýhty oiatatyn ánderdi shyrqap, merekeniń ajaryn asha tústi. Osylaisha, túrkistandyqtar Qazaqstan kóleminde atalyp ótilip jatqan patriottyq is-sharany joǵary deńgeide uiymdastyrdy.
Túrkistandaǵy «Rámizder alańyndaǵy» tuǵyrdyń biiktigi – 62,5 metr. Al Týdyń eni 12 metr bolsa, uzyndyǵy – 24 metr. Elimizdegi eń biik týtuǵyr men týdyń biri bolyp esepteledi.
Biyl 25 qazan ulttyq mereke retinde atalyp ótip jatyr. Memleket basshysy Qasym-Jomart Toqaev búgingi quttyqtaýynda Respýblika kúniniń mán-mańyzyna toqtalǵan bolatyn.
«Barshańyzdy Respýblika kúnimen shyn júrekten quttyqtaimyn! Qazaqstannyń Memlekettik egemendigi týraly deklaratsiia qasterli Táýelsizdigimizge jol ashty. Sondyqtan bul tarihi qujattyń mán-mańyzy zor. Biz biyldan bastap Respýblika kúnin ulttyq mereke retinde jańa mazmunda atap ótemiz. Osy bastama jurttyń keń qoldaýyna ie bolyp, dástúrge ainalaryna senimdimin. Respýblika kúni – halqymyzdyń rýhyn kóterip, eldigimizdi nyǵaitatyn, birligimizdi bekemdep, yntymaǵymyzdy arttyratyn aishyqty mereke. Jańǵyrǵan ulttyq merekemizge orai óńirlerde birligimizdiń simvoly – kók bairaǵymyzdy kóterýge arnalǵan saltanatty rásim ótedi. Bul – urpaq sanasynda otansúigishtik qasietti, eldik rýh pen ulttyq ustanymdy bekemdei túsetin mańyzdy shara. Kók týymyz – egemendik, azattyq, birlik, beibitshilik syndy izgi qundylyqtardy ushtastyratyn qasterli rámiz», – dedi QR Prezidenti Qasym-Jomart Toqaev.
2022 jyly Ulytaýda ótken Ulttyq quryltaidyń birinshi otyrysynda Qazaqstan Respýblikasynyń Prezidenti Qasym-Jomart Kemeluly Toqaev Respýblika kúni mártebesin qaita qalpyna keltirýdi jáne ony 25 qazanda Ulttyq mereke retinde atap ótýdi usyndy. Respýblika kúni Qazaqstannyń jańa tarihynda elimizdiń basty merekeleriniń biri bolyp qaita oraldy.
