Foto: facebook.com/aidarbek
«Respublica» partiiasynyń tóraǵasy málimdeme jasady, dep habarlaidy "Ult aqparat".
"Qurmetti qazaqstandyqtar, «Respublica» partiiasynyń músheleri, bizdiń jaqtastarymyz ben qoldaýshylarymyz! Partiianyń resmi túrde tirkelýi boiynsha jiberilgen jyly sózderińiz úshin partiia atynan jáne óz atymnan erekshe alǵys bildiremin!
Partiiany tirkeý protsesi ońai bolǵan joq, jarty jyl ishinde bizge birneshe ret bas tartýǵa týra keldi, biraq sońǵy kezeńde tolyq protsedýralyq talaptardy oryndap, tirkeýden ótý múmkindigine ie boldyq. Respublica partiiasy parlamenttik sailaýdy ótkizýdi qoldaidy jáne biz oǵan qatysýǵa daiynbyz, dep resmi túrde jariialaimyz.
Sailaý naýqany boiynsha bizdiń partiia Májilis depýtattyǵyna kandidattardyń tizimin qalyptastyrýǵa kirisedi. Respublica partiiasy barynsha ashyq jáne ádil irikteý ótkizedi. Sonymen qatar biz óz qatarymyzda óz isine quzyretti, adal, zamanaýi, adamgershilikti, yntaly azamattardy kórýge asyqpyz. Partiia - júielilik, tehnologiialylyq, adaldyq, adamgershilik syndy bizdiń negizgi qundylyqtarymyzben bólisetin jańa kóshbasshylardy óz qataryna kútedi" - dedi partiianyń tóraǵasy Aidarbek Hodjanazarov.
Onyń sózinshe, resmi túrde partiianyń sailaýǵa qatysýy týraly sheshim men kandidattardyń tizimi partiia quryltaiynda anyqtalady.
"Biz órshil jáne aýqymdy josparlardy qamtýdy kózdep otyrmyz. Osyny iske asyrý úshin bizge elimizdiń barlyq qalalary men aýyldarynda sizderdiń qoldaýyńyz qajet.
Eger óz kúshińiz ben múmkindikterińizge senimdi bolsańyz, aldaǵy sailaýda bizdiń májiliske, jergilikti máslihattarǵa kandidat retinde, partiiamyzdyń múshesi atanyp nemese bizden baqylaýshy bola alasyz.
Alǵa Qazaqstan! Alǵa Respublica!" - dep túiindedi partiia tóraǵasy.
