Iis jáne dám sezý qabiletteriniń buzylýy koronavirýstyń delta nusqasyn juqtyrǵan naýqastardyń azynda ǵana baiqalady. Naýqastarda kóbine asqazan-ishek aýrýlarynyń belgileri anyqtalǵan. Bul týraly reseilik virýsolog, Novosibir memlekettik ýniversitetiniń (NMÝ) biotehnologiia, mikrobiologiia jáne virýsologiia zerthanasynyń meńgerýshisi Sergei Netesov aitty, dep habarlaidy TASS agenttigi.
«Bir simptomdardyń úlesi kóterilip, basqa simptomdardyń úlesi azaiýda. Delta nusqasyn juqtyrǵan naýqastar arasynda iis jáne dám sezý qabiletiniń buzylýy az baiqalady, alaida asqazan-ishek aýrýlarynyń belgileri kóbirek kezdese bastady», - dedi virýsolog shtamnyń jańa simptomdary týraly qoiylǵan suraqqa jaýap retinde.
Netesovtiń aitýynsha, bul S aqýyzynyń retseptorlyq bailanystyrýshy domeniniń qurylymynyń ózgerýinen bolyp otyr. Soǵan sáikes, onyń jasýshalarǵa áser etý ereksheligi de ózgeriske túsken. «Baiqaýymyzsha, olar bir-birimen tyǵyz bailanysta. Mundai jasýshalar ókpede de, qan tamyrlarynyń qabyrǵalarynda da, ishekte de kezdesedi. Simptomdardyń aýysýy osyǵan bailanysty bolýy ábden múmkin», - dep qosty ol.
Virýsolog delta shtamynyń aǵzada tez kóbeietini buǵan dálel bola alatynyn atap ótti. «Buny kóp elderdiń koronavirýs boiynsha derekteri rastai alady. Sol sebepti de vaktsinalaý qarqyny joǵary elder de zardap shegýde», - dep túsindirdi Netesov.
