Reseiden gaz importyn azaitý úshin Eýropa Odaǵy (EO) Afrika elderimen gaz jetkizý salasyndaǵy yntymaqtastyqty ornyqtyrý múmkindigin qarastyryp jatyr. EO elderi 2022 jyly energetika salasynda Máskeýge táýeldiligin úshten eki esedei azaitpaq niette. Ózara syrtqy energetikalyq árekettestikti keńeiter qujatty Eýrokomissiia álden-aq, mamyrdyń aiaǵynda qabyldaýy múmkin. Bul jóninde EO qujatynyń jobasyna silteme jasap Bloomberg habarlady, dep jazady Azattyq.
Qujatta Nigeriia, Senegal jáne Angola tárizdi Afrika elderiniń "suiyltylǵan gaz salasynda iske jaratylmaǵan áleýetke aitarlyqtai dárejede ie" ekeni aitylǵan.
Eýropa Odaǵy suiyltylǵan gaz importyn jylyna 50 milliard tekshe metrge, Reseiden bóten jerden qubyrmen tasymaldanatyn gaz importyn 10 milliard tekshe metrge ulǵaitpaq niette. Qujat jobasynda bul úshin dástúrli jetkizip berýshilermen qarym-qatynastardy jańa sharttar negizinde jolǵa qoiý ári jańa otyn jetkizýshilermen saýdany keńeitý kerek bolatyny aitylǵan.
Eýroodaq josparynda buǵa qosa 2022 jyly AQSh-tan qosymsha 15 milliard tekshe metr suiyltylǵan gaz tasý jáne 2030 jylǵa deiin onyń kólemin jyl saiyn 50 milliard tekshe metrge deiin jetkizý qarastyrylǵan. Sonymen qatar, EO Ázirbaijannan jetkiziletin gazdy jylyna 20 milliard tekshe metrge deiin arttyrmaq.
Buǵan deiin Bloomberg agenttigi Eýropa Odaǵy bilik oryndarynyń jyl aiaǵyna qarai Resei munaiyna embargo jariialaýǵa ázirlenip jatqanyn, al oǵan deiin birtindep importqa shekteý engizý nieti baryn habarlaǵan. Máskeýge salynatyn jańa shekteýlerdi EO elderi elshileri eń taiaý kúnderi talqylaýdy josparlap otyr.
- Reseide biýdjet kirisiniń teń jartysyna derligin jáne eksporttan túsetin tabystyń jartysynan astamyn munai-gaz sektory qamtamasyz etip otyr. Gazdyń 70 paiyzyn ári munai men munai ónimderiniń 60 paiyzyn Resei naq osy Eýropaǵa satyp paida tabady.
- Kremldiń Ýkrainadaǵy soǵysty qarjylandyrý múmkindigin shekteý úshin Eýroodaq elderiniń kóbi Reseiden alatyn energiia tasymaldaýshy taýarlaryn azaitýdy kózdeitin sharalardy qabyldap jatyr. Bulai isteýden tek Vengriia ǵana úzildi-kesildi bas tartyp otyr.
