RF Krasnoiarsk aimaǵyndaǵy Achinsk qalasynyń turǵyndary 6 tamyz kúni jergilikti ýaqyt boiynsha saǵat 12.00-de RF Azamattyq qorǵanys, tótenshe jaǵdailar jáne tabiǵi apat saldaryn joiý ministrliginen SMS habarlama alǵan. Onda jarylmai qalǵan snariadtardy taýyp alǵanda ne isteý kerektigi habarlanǵan, dep jazdy Izvestiia basylymy.
5 tamyz kúni Achinsk qalasynan 20 shaqyrym jerde ornalasqan áskeri bólimniń qarý-jaraq qoimasynan órt shyǵyp, saldarynan jarylys boldy. Kóp uzamai Achinsk aýdanynda tótenshe jaǵdai engizildi. RF Qorǵanys ministrligi qazirgi ýaqytta órt tolyqtai óshirilgenin málimdedi.
«Jarylmai qalǵan snariadtardy nemese ózge de jarylǵysh zattardy taýyp alsańyz, Achinsk aýdanynyń senim telefonyna habar berińiz», - delingen SMS habarlamada.
Qoimadaǵy jarylysqa bailanysty 20 km radiýstaǵy eldi mekenderden 16 myń adam qaýipsiz jerge kóshirilgen, olardyń 3,8 myńy ýaqytsha shoǵyrlandyrý oryndarynda qalýǵa kelisken. Sonymen qatar, halyqtyń múlkin saqtaý boiynsha kúzet qoiylǵan. Qutqarýshylar turǵyndary evakýatsiialanǵan aýyldardy tekserip jatyr.
«Jarylys saldarynan 12 adam zardap shekti, onyń altaýy ortasha jaraqatpen emhanaǵa jatqyzylǵan», - deidi Achinsk aýdanaralyq aýrýhanasynyń bas dárigeri Denis Lebedev.
Sondai-aq, bir adam iz-túzsiz joǵalyp ketkeni týraly málimet tirkelgen.
