Qorǵan oblysynyń Makýshin aýdanynda alǵashqy qazaq synybynyń ashylýyna orai Soltústik Qazaqstan oblysynan delegatsiia baryp, ádistemelik oqýlyqtardy syiǵa tartty, dep habarlaidy "Ult aqparat".
Qorǵan oblysynda búginde 12 myńǵa jýyq etnikalyq qazaq turady. Eresekter jaǵy ana tilin jáne ulttyq mádenietti úkimettik emes uiymdardyń quramynda qoǵamdyq qyzmetti júzege asyrý barysynda qoldanýǵa múmkindik alsa, balalarǵa qazaq tilin meńgerý qiyndyq týdyratyn. Bul másele endi sheshimin taýyp otyr.
Qazaqstan halqy Assambleiasynyń oblystyq filialynyń málimetinshe, igi bastamaǵa Qorǵan oblysy qazaqtarynyń Ulttyq-mádeni avtonomiiasynyń tóraǵasy Qairat Oralov muryndyq boldy. Makýshin aýdanynda qazaq synybynyń ashylý saltanatyna óńirden tilderdi damytý jónindegi basqarma, «Dúniejúzi qazaqtary qaýymdastyǵy» respýblikalyq qoǵamdyq birlestiginiń oblystyq filialy jáne «Qoǵamdyq kelisim» KMM ókilderi kirgen delegatsiia bardy.
Is-sharaǵa qatysýshylar Qazaqstan men Resei óńirleri arasyndaǵy shekaralyq yntymaqtastyqty nyǵaitý boiynsha mańyzdy máselelerdi talqylady.
«Qazaqy dástúr boiynsha synyp oqýshylary men olardyń ata-analary bizdi shashý shashyp qarsy aldy. Qazaq synybynyń ashylýy eldegi ultaralyq kelisimdi bekitedi, eki oblystyń ǵana emes, Qazaqstan men Resei arasyndaǵy dostyq qarym-qatynasty damytady. Mundai is-sharalar áleýmettik-saiasi, bilim berý, densaýlyq saqtaý jáne mádeniet salalarynda ózara tájiribe almasýǵa myqty tuǵyrnama», - deidi delegatsiia músheleri.
Soltústikqazaqstandyqtar Resei qazaqtary úshin qundy syilyq - qazaq tilin úirený boiynsha ǵylymi-ádistemelik ádebietterdi usyndy. Oqý quraldarynyń 50-ge jýyq danasy oqýshylarǵa tildi tiimdi jáne tereńdetip oqýǵa múmkindik bermek.
