16 qyrkúiekte Reseide jyl saiyn ótkiziletin "Tsentr-2019" strategiialyq komandalyq-shtabtyq áskeri jattyǵý bastaldy. 21 qyrkúiekke deiin jalǵasatyn jattyǵýǵa Qazaqstan, Qyrǵyzstan, Qytai, Ózbekstan, Pákistan men Úndistan áskerileri de qatysady.
Bul joly jattyǵýlarda Ortalyq áskeri okrýgi (Reseide buǵan qosa, Batys, Shyǵys jáne Kavkaz áskeri okrýgteri bar) basty nazarǵa alynady. Resei qarýly kúshterin modernizatsiialaýdy bastaǵan 2008 jyldan beri Ortalyq áskeri okrýginde jattyǵý eki ret: 2011 jáne 2015 jyldary ótkizilgen.
Resei qorǵanys ministrliginiń habarlaýynsha, biylǵy jattyǵý barysynda "Ortalyq-aziialyq strategiialyq baǵytta halyqaralyq terrorizmmen kúres jáne qaýipsizdikti qamtamasyz etý mindetin atqarý kezinde memleketter koalitsiiasy áskeri tobyn (kúshterin) qoldaný máseleleri pysyqtalmaq".
Resei qorǵanys ministri Sergei Shoigý bul jattyǵý qandai da bir úshinshi elge qarsy baǵyttalmaǵanyn jáne negizgi nazardy "terrorǵa qarsy" operatsiialarǵa aýdaratynyn málimdese, reseilik "Voenno-promyshlennyi kýrer" áskeri basylymy jattyǵý stsenariii "shyn máninde, eń aldymen "bir armiianyń ekinshi armiiaǵa qarsy" klassikalyq áskeri is-qimyldary pysyqtalyp, birinshi kezeńde dushpannyń agressiiasyna toitarys berý (sonyń ishinde aviatsiialyq jáne zymyran soqqysymen), ekinshisinde qarsy shabýylǵa shyǵýǵa" qurylǵanyn jazady. Reseilik "Vedomosti" gazeti ministr Shoigýdyń jattyǵýdyń "segiz poligon men Kaspii teńizi akvatoriiasynda" ótetini týraly aitqanyn keltirgen. Basylymnyń jazýynsha, negizgi maqsattardyń arasynda, "Ortalyq Aziia aimaǵyndaǵy yqtimal agressiianyń aldyn alý" da bar.
Reseilik basylymdar bul jattyǵýǵa Tájikstan da qatysady dep habarlady.
Bul osy jattyǵý tarihyndaǵy eń irisi bolmaq. AQSh-tyń Jamestown Foundation taldaý ortalyǵynyń dereginshe, oǵan "128 myń adam, 20 myń áskeri tehnika men qarý quraly, 600 ushaq pen tikushaq jáne 15 áskeri keme" jumyldyrylady".
Buǵan deiin "Tsentr-2015" jattyǵýyna 95 myń adam qatysqan. Ol kezde jattyǵý reseilik áskerilerdi Siriiadaǵy soǵys is-qimyldaryna daiyndaý retinde ótkizilgen bolatyn dep habarlady "Voenno-promyshlennyi kýrer" basylymy.
Jamestown Foundation taldaý ortalyǵy esebinde "Tsentr-2019" jattyǵýy "terrorǵa qarsy is-qimyldarǵa emes, halyqaralyq soǵysqa daiyndyqqa uqsaidy" jáne de bul sońǵy jyldary ótkizilip kele jatqan reseilik strategiialyq jattyǵýlardyń barlyǵyna tán dep jazady.
