Reseide esepte turǵan bir ǵana kólik Almaty oblysynda 5 million teńgeden astam somaǵa jol erejelerin buzdy, dep habarlaidy QazAqparat.
Almaty oblysynyń aýmaǵynda ornalasqan avtomatty rejimde jumys isteitin sertifikattalǵan arnaiy baqylaý-ólsheý tehnikalyq quraldary Qazaqstan aýmaǵynda jol erejesin buzǵan, ýaqytsha tirkeýi jáne saqtandyrý mindettemesi joq shet memleketterdiń nómirimen júrgen 92 avtokólikti tirkegen.
Olardyń aiyppulynyń jalpy somasy 42 mln 442 myń 350 teńgege jetken.
«Mysaly, Resei Federatsiiasynyń VAZ-2114 markaly avtokóliginiń qatysýymen jalpy somasy 5 mln 817 myń teńgege 184 ákimshilik quqyq buzýshylyq jasaldy. PD ÁPB ákimshilik tájiribe bóliminiń qyzmetkerleri atalǵan kólikti ustap, Qaskeleń qalasynyń arnaiy avtoturaǵyna qoidy. Anyqtalǵan avtokóliktiń júrgizýshisi QR ÁQBtK 590-babynyń 2-bóligi (kólik quralyn paidalaný erejelerin buzý) boiynsha ákimshilik jaýapkershilikke tartyldy», – dep atap ótti Almaty oblystyq politsiia departamenti ákimshilik politsiia basqarmasy ákimshilik is-tájiribe bóliminiń bastyǵy Saiat Ibraimov.
Ustalǵan búkil kólikterge jalpy somasy 10 mln teńgeden astam aiyppul túrindegi ákimshilik jaza qoldanyldy.
Belgilengen tártipte tirkelmegen kólikterge QR ÁQBtK 590-babynyń 2-bóligi boiynsha qoldanystaǵy ákimshilik zańnamaǵa sáikes ákimshilik sharalar qoldanylady.
