Reseidiń Riazan oblysyna qarasty Qasymov qalasynda Joshy ulysynan shyqqan Oraz-Muhammed sultanǵa memorialdyq taqta ornatyldy, dep habarlaidy "Ult aqparat" Reseidegi Qazaqstan elshiliginiń baspasóz qyzmetine silteme jasap.
Qasym handyǵyn basqarǵan Oraz-Muhammed sultanǵa eskertkish taqtany ornatý ideiasynyń avtory – Resei Federatsiiasyndaǵy Qazaqstan Respýblikasynyń Tótenshe jáne Ókiletti Elshisi Imanǵali Tasmaǵambetov. Estelik belgi Oraz-Muhammed jerlengen Eski tatar ziratynda, Reseidiń mádeni muralar nysanyna engen Aýǵan-Muhammed sultannyń kesenesine jaqyn jerde ornatyldy.
«Sóz joq, bul – bir tulǵaǵa ǵana emes, tutas bir dáýirge, sonaý alasapyran dáýirdegi qazaq sultandyǵynyń Reseidegi tarihi izine, eki halyqtyń arasyndaǵy dostyq pen yntymaqtyń, birlik pen tirliktiń ózine qoiylǵan eskertkish dep bilemin. Sol sebepti, Oraz-Muhammedtiń esimi búgingi urpaq sanasynda orys-qazaq dostyǵynyń simvoly ári eki el arasyndaǵy diplomatiialyq alys-beristiń qarlyǵashy retinde máńgi saqtalady», - dedi saltanatty shara barysynda Elshi Imanǵali Tasmaǵambetov.
Ol sondai-aq bastamaǵa qoldaý kórsetken Riazan oblysynyń ákimshiligi men diplomatiialyq ókildigine alǵys bildirdi.
Memorialdyq taqtany jasaý úshin tabiǵi qońyr tústi granit paidalanylǵan. Eskertkishtiń biiktigi úsh metr. Tóbesine doǵal kúmbez ornatylǵan. Estelik taqtaǵa «Oraz-Muhammed Ondanuly, 1573-1610. Qazaq sultany, Qasym handyǵyn bileýshi», dep jazylǵan.
Eske sala keteiik, Oraz-Muhammed sultan Qazaq handyǵynyń negizin qalaǵan Jánibek hannyń tikelei urpaǵy, Táýekel hannyń inisi Ondan sultannyń uly. Ol óz zamanynda orys patshasyna baǵynyshty aimaqta handyqty bilep, qazaq sultandarynyń arasynda shet elde úlken abyroiǵa ie bolǵan áigili tarihi tulǵanyń biri.
Oraz-Muhammedtiń erligi men ómiri týraly kóptegen derekterdi jat jerde sultannyń senimdi serigine ainalǵan shejiresi Qadyrǵali Jalairi jazyp qaldyrǵan. Jazýshy Muhtar Maǵaýinniń «Alasapyran» atty tarihi romanynda qazaq sultanynyń qairatkerligi, parasattylyǵy men qaharmandyq kelbeti sheber sýretteledi.
