Reseidiń Irkýtsk oblysynyń soty "adam óltirýge áreket etti" jáne "buzaqylyq jasady" dep kúdikke ilingen Tájikstannyń úsh azamatyn qamaýǵa alý jóninde sheshim shyǵardy, dep habarlaidy Azattyq.
Kýrbonmad Sodikov pen Daler Hasanov atty tájik azamattary "Adam óltirýge áreket etý", Jýmaboi Iskandarov "Buzaqylyq" baby boiynsha aiyptalǵan. Tergeý málimetine sáikes, olar migranttar men jergilikti turǵyndar arasynda bolǵan janjalǵa qatysqan. Tóbelesten keiin migranttar turatyn vagon órtengen.
12 qarashaǵa qaraǵan túni Irkýtsk oblysyndaǵy Zalari aýylynda eńbek migranttary turyp jatqan qurylys vagonyna órt qoiylyp, Tájikstannyń 21 jáne 19 jastaǵy eki azamaty qaitys bolǵan. Budan bólek bes tájik aýyr jaraqat alyp, aýrýhanaǵa jetkizilgen.
Osyǵan deiin vagonǵa órt qoidy degen kúdikpen jergilikti úsh turǵyn qamaýǵa alynǵan. Biraq Ozodi radiosynyń derekkózine qaraǵanda, qamalǵandardyń biri ǵana abaqtyda otyr, qalǵany bostandyqa shyqqan.
Janjaldy kórgen migranttardyń biri oqiǵanyń mán-jaiyn bylai baiandady:
"Jergilikti aýmaqta turatyn óte kóp adam keldi. Arasynda politsiia formasyndaǵy adamdar da júrdi. Olar biz turatyn vagon esigin jaýyp, qamap, syrtymyzdan órt qoidy. Biz esikti syndyryp, syrtqa shyqqanda, temirlermen bizdi sabady", - dedi migrant.
Al qaza bolǵan eki tájik azamaty aýyr jaraqat alyp, órtenip jatqan vagonnan shyǵa almai qalýy múmkin dep boljaidy.
Osyǵan deiin birqatar orys basylymdary janjalǵa "migranttardyń qyzdarǵa tiisýi sebep bolǵan" dep jazdy.
Biraq oqiǵaǵa kýá bolǵan migranttardyń biri bul málimetti teriske shyǵarady.
"Bul málimet jalǵan. Bizdiń jigitter migranttardyń biriniń ákesin kútip alýǵa ketken. Ol jerde alty adam olarǵa tiisip, kemsitken", - deidi ol.
Oqiǵanyń basqa kýágerleri migranttarǵa qol jumsaǵandardyń ishinde politsiia qyzmetkerleri bolǵanyn rastaidy.
Irkýtsk oblystyq prokýratýrasy men ishki ister ministrliginiń oblystyq basqarma qyzmetkeri úsh adamdy nelikten bostandyqqa shyǵarǵanyn túsindirýden bas tartty.
Tájikstannyń Reseidegi elshiligi bul oqiǵanyń tergelýin jiti baqylaýǵa aldyq dep málimdedi.
