Soltústik Qazaqstan oblysynyń politseileri «Izdestirý» respýblikalyq jedel-aldyn alý is-sharasynyń eki kúninde izdeýde júrgen bes qylmyskerdi tapty, dep habarlaidy QazAqparat.
SQO politsiia departamenti baspasóz qyzmetiniń málimetinshe, Resei politseileri alaiaqtyq jasaǵany úshin 55 jastaǵy áielge izdeý jariialaǵan. Ivanovsk oblysynyń politsiia qyzmetkerleri ony 2016 jyldan beri taba almai kelgen. Petropavldyń jedel ýákilderi áieldiń oblys ortalyǵynda júrgen jerin anyqtady.
Al Qyzyljar aýdanynyń tártip saqshylary 38 jastaǵy Qaraǵandy oblysynyń turǵynyn turaqty mekenjaiy joq adamdardyń arasynan tapty. Er adamdy Reseidiń Voljsk qalasyndaǵy týystary izdestirgen. Aitýlarynsha, qyrkúiek aiynyń basynda ol Reseige týystaryna qonaqqa kelýi kerek bolǵan, alaida barar jerine jetpegen. Mazasyzdanǵan týǵandary politsiiaǵa aryzdanǵan. Soltústikqazaqstandyq politseiler izdeýde júrgen er adamdy taýyp, sheteldegi týystaryna telefon arqyly habarlasýǵa múmkindik berdi. Jaqyn kúnderi ol úiine qaitýǵa ýáde etti.
Politseiler «Izdestirý» respýblikalyq jedel-profilaktikalyq is-sharasy aiasynda jumys istedi. Eki kúnniń ishinde soltústikqazaqstandyq jedel ýákilder bes qylmyskerdi izdep tapty.
«Ótkizilip jatqan aktsiia barysynda izdeýdegi qylmyskerlerdi anyqtaý boiynsha jumys jandandyryldy. TMD elderindegi áriptesterimizben tyǵyz qarym-qatynasta jumys isteimiz. Mundai yntymaqtastyqtyń jedel is-sharalardy ótkizýde tiimdiligi zor», - deidi SQO PD bastyǵynyń orynbasary Rýslan Nazarov.
