Resei monopoliiamen kúres federaldyq qyzmeti (FAS) Apple korporatsiiasyna aifon qoldanýshylarynyń jeke aqparatyn jinaýǵa múmkindik beretin qosymshaǵa tyiym salǵany úshin 906 mln rýbl (12 million dollardan astam) kóleminde aiyppul saldy. Vedomstvo ókilderi korporatsiiany telefon qosymshasy naryǵynda monopoliia jasap aldy dep aiyptady.
Shaǵymdy kompiýterlerge antivirýs baǵdarlamalary men qorǵanysh quraldaryn ornatatyn "Kasperskii zerthanasy" kompaniiasy túsirgen. Kompaniia ókilderiniń aitýynsha, Apple olardan ata-ana baqylaýy týraly qosymshanyń fýnktsionaldaryn qysqartýdy talap etken. Bul ata-analarǵa balalardyń júrgen jerin, qurylǵyny qansha saǵat paidalanatynyn, qandai qosymshany kóretinin baqylaýǵa múmkindik beredi.
2019 jyly sáýir aiynda Apple mundai baǵdarlamalyq jabdyqtar qoldanýshylardyń qaýipsizdigine qaýip tóndirgendikten shekteý qoiatynyn málimdegen. Mundai baǵdarlamalar is júzinde bógde úshinshi tarapqa qurylǵyǵa kirýge múmkindik beredi.
"Balalarynyń qaýipsizdigine alańdaǵan ata-analar jeke derek pen qaýipsizdik máselelesine kelgende mámilege barmaýy tiis. Sizden basqa eshkim balańyzdyń qurylǵysyna kire almaýy tiis" degen edi korporatsiia ókilderi.
2019 jyly tamyz aiynda Resei monopoliiamen kúres federaldyq qyzmeti Apple-ǵa "zańbuzýshylyqty joiý" týraly nusqaýlyq bergen. FAS korporatsiiadan bógde mamandardyń qosymshasyn engizýge tyiym salatyn erejeni alyp tastaýdy talap etken.
Buǵan qosa, korporatsiiadan ata-ana baqylaýy týraly qosymsha ielerine mańyzdy fýnktsionaldy óshirý týraly talap qoimai, ónimderin taratýdy talap etken. Bul nusqaýlyq sotta qaraldy jáne sot aiaqtalǵanǵa deiin nusqaýlyq kúshi toqtatylǵan.
