Reseidiń Arhangelski oblysynda Nenoksa - Severodvinski baǵyty boiynsha poiyzǵa mingen AQSh elshiliginiń úsh ókilin poiyzdan túsirip tastady. AQSh memlekettik departamentiniń habarlaýynsha, Amerika jaǵy buǵan deiin diplomattardyń resmi sapary jaily Resei jaǵyn qulaǵdar etken.
Buǵan deiin qupiia derekkózge súiengen "Interfaks" agenttigi rejimdik aýmaqqa kirmek bolǵan amerikalyqtardyń ustalǵanyn habarlaǵan. Agenttiktiń dereginshe, ustalǵandar arasynda áskeri-teńiz attashesi, AQSh elshiliginiń áskeri attashesi bolǵan.
"Interfakstyń" jazýynsha, oqiǵa 14 qazanda Severodvinski stantsiiasy mańynda bolǵan. Rejimdik aýmaqqa kirýi úshin diplomattardyń qajetti qujattary bolmaǵan. Derekkózdiń habarlaýynsha, qujattaryn teksergennen keiin diplomattardy bosatyp jibergen.
Reseidiń syrtqy ister ministrliginiń aitýynsha, elshilik ókilderi qorǵanys ministrligin resmi sapary jaiynda eskertken, biraq olar tek Arhangelskige ǵana baratynyn aitqan.
Nenoksada Reseidiń áskeri-teńiz kúshteriniń synaq poligony ornalasqan. 8 tamyzda onda jarylys bolyp, Resei biligi "Rosatomnyń" bes qyzmetkeri, eki áskeri qyzmetkerdiń qaza bolǵanyn málimdedi.
Resmi oryndar "jarylys radioizotopty energiia kózinen shyqqan" dep habarlady. Biraq resmi málimdemede naqty qandai tehnikaǵa qatysty ekeni aitylmady. Buǵan deiin kóptegen zertteýshiler túrli boljam aitqan. "Býrevestnik" qurlyqaralyq zymyrany jaryldy degen nusqa da boldy.
Ótken apta sońynda AQSh memlekettik departamenti Reseidiń Arhangelski oblysyndaǵy poligonda bolǵan jarylys Aq teńizdiń túbinen iadrolyq qondyrǵysy bar "Býrevestnik" zymyranyn alyp shyǵý kezinde bolǵan degen qorytyndy jasady.
