Qazaqstandyq ánshi Dimash Qudaibergen Sochidegi «Novaia volna» jas ánshilerdiń halyqaralyq baiqaýynda alǵash ret án shyrqady, dep habarlaidy "Ult aqparat".
Dimash baiqaýdyń alǵashqy kúni A'Studio tobynyń shyǵarmashylyq keshinde óner kórsetti. Oǵan Resei estradasynyń juldyzdary, qazaqstandyq ánshiler - The Jigits toby men repper Jah Khalib te qatysty. Dimash A'Studio-nyń «Greshnaia strast» kompozitsiiasyn orys tilinde oryndap, jinalǵandardyń qoshemetine bólendi.
Ánniń sońynda zal dý qol shapalaq soǵyp, gúl shoqtaryn syilaý úshin sahnaǵa umtyldy. Óz kezeginde Dimash olarǵa alǵys bildirip, Qazaqstanǵa shaqyrdy.
Budan buryn habarlaǵanymyzdai, Dimash Qudaibergen Reseide ótip jatqan "Jas tolqyn" baiqaýyna arnaiy shaqyrtýmen keldi. Alaida qatysýshy retinde emes, qurmetti qonaq retinde qatysty.
"Jas tolqyn" baiqaýynyń qonaǵy bolyp, Reseige taban tiredik. Baiqaý bastaldy. Endi baiqaýdyń jabylý saltanatynda óner kórsetemin. Barsha kórermenge úlken rahmet. Sochige kelgeli áýejaida tamasha kontsert qoiyp, dám-tuzben kútip alǵan kórermenderimnen ainaldym. Qurmetterińizge úlken alǵys", — dedi ánshi.
Dimashtyń ónerine tánti bolǵan belgili kompozitor Igor Krýtoi men ánshi Ani Lorak, zaldaǵy kórermender oryndarynan turyp qoshemet kórsetti. Al fanattary Dimashtyń qushaǵyn gúlge toltyrdy. Bul joly da júrgizýshi "Nikolai Baskov muny kórse, júrek talmasy ustap qala ma dep qorqamyn" dep ázildedi.
Reseilik tanymal ánshi Filipp Kirkorov ta Dimash Qudaibergenniń talantyn erekshe baǵalaǵan. Bul týraly "Mýz-TV" telearnasynyń bas direktory Arman Dáýletiiarov instagramdaǵy paraqshasynda jazdy. Onyń jazbasynyń astyna pikir qaldyrǵan belgili reseilik ánshi Nikolai Baskov "Keremet!" dep tamsanǵan.
"Búgin "Jas tolqyn" baiqaýynda áiteýir degende Dimash Qudaibergenmen tanystym. Bul jigit óte talantty jáne Qazaqstan men Qytaida erekshe tanymaldylyqqa ie! Búgin "A-studio"ánimen reseilik tyńdarmandardy tań-tamasha etken jaiy bar. Tipti, estrada koroli Kirkorovtyń ózi Dimashtyń tabystylyǵyn laiyq deńgeide baǵalady", — dedi ol.
Aita keteiik, «Novaia volna» baiqaýy 2002 jyldan beri ótkiziledi. Onyń negizin qalaýshylar - kompozitorlar Igor Krýtoi jáne Raimond Paýls. Tanymal ánshi Alla Pýgacheva baiqaý qatysýshylarynyń mýzasy, ol 2005 jyldan 2014 jylǵa deiin óziniń «Zolotaia zvezda Ally» syilyǵyn tabys etip kelgen bolatyn. Onyń syilyǵyn qatarynan eki ret alǵan jalǵyz qatysýshy - Qazaqstannyń «Rin'Go» toby (2007 jáne 2011 jyldary).
«Novaia volna-2018» baiqaýynda Qazaqstan atynan astanalyq Madiiar Júnisov (sahnada - Mad June) qatysyp jatyr.
