Resei Japoniiaǵa japon áskerileriniń súiekteri jatýy múmkin Baikal aýmaǵynda jańadan qazba jumystaryn júrgizýge ruqsat bermedi. Bul aqparatty Japoniianyń qoǵamdyq arnasyna silteme jasaǵan TASS agenttigi habarlady.
Japoniianyń aqparat quraldarynyń habarlaýynsha, zertteý toby Reseige qyrkúiek aiynyń sońynda attanýy tiis bolǵan, alaida Máskeý Japoniianyń syrtqy ister ministrligine "birqatar máselelerge" bailanysty qazba jumystaryn júrgizý múmkin emes dep aitqan. Máskeýdiń neni meńzegeni ázirge belgisiz.
Al Tokio qazba jumystaryn jalǵastyrý boiynsha Máskeýmen qaita kelissóz ótkizýge qulyqty. Reseilik vedomstvo qazba jumystaryna ruqsat bermeýiniń sebebin túsindirgen joq.
Buǵan deiin Japoniianyń densaýlyq saqtaý ministrligi birneshe jyl buryn Baikal óńirinen qazyp áketilgen súiekter japon tutqyndary emes degen qorytyndy jasaǵan. Derek boiynsha, Reseiden Japoniiaǵa ár jyldary jalpy sany 597 súiek jetkizilgen. Japon ǵalymdary DNQ-synaq júrgizip, qorytyndysyn jariialady. Japoniia jaǵynyń súiekterdi Reseige qaitarmaǵany habarlanǵan.
Ekinshi dúniejúzilik soǵys 1945 jyly qyrkúiektiń 2-sinde Japoniianyń kapitýliatsiia aktisine qol qoiýymen aiaqtaldy. Sahalin men Kýril araldarynda shamamen 600 myń japon sarbazy Mońǵoliia jáne Sovet Odaǵy aýmaǵyndaǵy lagerlerge jiberildi. Japoniia tarabynyń dereginshe, lagerde shamamen 55 myń adam ólgen, 33 myńynyń súiegi burynǵy SSSR men Mońǵoliiada dep aitylady.
