Resei Ulybritaniianyń sanktsiialaryna jaýap retinde britan diplomattaryn eline qaitarmaq. RIA "Novosti" agenttiginiń habarlaýynsha, bul jaiynda 15 naýryzda Resei syrtqy ister ministri Sergei Lavrov málimdedi. Lavrov naqty qansha diplomattyń eline qaitarylatynyn jáne bul sharalardyń qashan oryndalatynyn taratyp aitpady. Ol Londonnyń Máskeýdi Resei syrtqy barlaý qyzmetiniń burynǵy ofitseri Sergei Skripal men qyzyn ýlady dep aiyptaǵanyn "dálelsiz aiyptaý jáne arsyzdyq" dep atady.
14 naýryz kúni Ulybritaniia premer-ministri Tereza Mei Reseidi Skripaldi ýlady dep aiyptap, Reseidiń 23 diplomaty elden shyǵarylatynyn málimdegen. AQSh prezidenti ákimshiligi Reseidi "halyqaralyq quqyqty únemi buzady" dep aiyptap, Londonnyń bul sharasyn qoldaǵan.
14 naýryzda budan keshteý BUU Qaýipsizdik keńesiniń otyrysynda Ulybritaniianyń BUU-daǵy elshisi Reseidi "Himiialyq qarýǵa tyiym salý týraly halyqaralyq konventsiiany buzdy" dep aiyptaǵan. Britan tergeýshileriniń boljamynsha, Skripal men qyzy Iýliia jasalýy óte qiyn "Novichok" dep atalatyn himiialyq zattan ýlanǵan. Tergeýshiler memleket járdeminsiz mundai himiialyq zatty qoldan jasaý múmkin emes deidi.
Skripaldiń isine bailanysty Ulybritaniia syrtqy ister ministri Boris Djonson Resei prezidenti Vladimir Pýtinniń jaqyn serikterine qarsy sanktsiia salynatynyn jariialady.
Sergei Skripal men qyzy Iýliia naýryzdyń 4-i kúni Solsberidegi saýda ortalyǵynda es-tússiz kúide tabylyp, aýrýhanaǵa jetkizilgen. Sergei Skripaldi 2006 jyly Resei soty "Ulybritaniia tyńshysy" dep aiyptap, 13 jylǵa túrmege qamaýǵa úkim etken. 2010 jyly Máskeý AQSh-ta ustalǵan reseilik on agentti Reseide Batys múddesine tyńshylyq etken degen aiyppen sottalǵan tórt adamǵa almastyrǵan kezde solardyń arasynda Skripal da bolǵan. Ol sodan beri Ulybritaniiada turyp jatqan.
