© AP Photo / David Goldman
Reseilik qutqarýshylar Kýzbasstaǵy "Listviajnaia" shahtasynda 52 adam qaitys bolǵanyn rastady. Shahtada qalyp qoiǵan 46 kenshi men 6 qutqarýshy kóz jumdy, - dep habarlaidy Sputnik Qazaqstan.
"Listviajnaia" shahtasyndaǵy tragediia 25 qarashada tańǵy ýaqytta bolǵan. Jer astynda metan jarylyp, shahtany kók tútin alyp ketti. Sol kezde 285 adam jumys istep jatqan.
"Baza" Telegram-arnasy aman qalǵan kenshilermen sóilesip, oqiǵanyń mán-jaiyn bildi.
"Bizde birinshi aýysym bolǵan. Jumysqa kelgende tútin basqanyn kórdik. Ekinshi vahtanyń jigitteri bizdiń aldymyzda birshama tereńdikke túsip ketti. Bireý shala-jansar kúide, endi bireýdi qoltyqtap alyp shyǵyp jatqan", - dedi bir kenshi.
Onyń aitýynsha, bir saǵat ishinde kómekke órt sóndirýshilerden basqa eshkim kelmegen. Kenshiler bolsa, áriptesterin óz kúshimen qutqarýǵa tyrysqan.
"Jerdi sipalap júrip, jigitterdi shyǵardy. Ishte qalǵandardyń aman qalýy ekitalai. Ol jerde aýa joq qoi. Túngi aýysymnan shyqqandar jarylys kezinde shliýzdar opyrylyp qaldy dep aitqan. Búkil jerdi tútin alyp ketti. Dem alý qiyn, gaz óte kóp boldy. Ondaida báribir kómir kesýge májbúrleidi", - deidi er adam.
Jerdiń ústinde bolǵandar jarylysty estigen joq. Al astynda júrgen kenshiler jarylystan keiin ekpindi tolqynnyń kóterilgenin aitty. Odan keiin kók tútin kóterilip ketti. Túk kórinbei qaldy.
"Ekpindi tolqynnyń qatty bolǵany sonsha, keibir kenshiler qulap tústi. Biz júgirip baryp, "Qutqarýshyǵa" ("Shahtalyq ózin-ózin qutqarý quraly" - jerasty apattar kezinde kenshilerdiń jeke qorǵaný quraly, onymen birshama ýaqyt dem alýǵa bolady – Sputnik) qosylýǵa tyrystyq. Men úlgermei qaldym. Sodan esimnen tanyp qaldym. Esimdi jisam, janymda bir adam jatyr. Men birden "Qutqarýshy" arqyly dem ala bastadym. Taý-ken sheberiniń daýsyn da estidim. "Jatpańdar, turyńdar!" dep aiqailap, árbireýimizdi túrtip júrdi. Ol da shyǵa almai qaldy. "Qutqarýshy" 300 minýtqa jetedi ǵoi, biraq júre berseń, 60 minýtqa kómektesedi", - deidi taǵy bir kenshi.
Jarylystan keiin 38 kenshi aýrýhanaǵa tústi. Odan keiin taǵy 11 qutqarýshy jetkizildi. Bireýi bas jaraqatyn aldy.
Kemerovo oblysynyń gýbernatory Sergei Tsivilevtyń aitýynsha, "Listviajnaia" shahtasyndaǵy metan tabiǵi jolmen taralýy qajet. Oǵan úsh kúndei ketedi. 25 qarashada qutqarý operatsiiasy toqtatyldy. Óitkeni birneshe qutqarýshy qaza boldy.
Tótenshe jaǵdaidan keiin shahta direktory, onyń birinshi orynbasary jáne ýchaske bastyǵy ustaldy. Olar óndiristik qaýipsizdik talabyn buzǵany úshin aiyptalyp otyr.
