Resei Prezidenti Vladimir Pýtin Almazbek Atambaevpen kezdesýin qorytyndylai kele, qyrǵyzstandyqtar qazirgi prezident Jeenbekovtiń tóńireginde toptasýy tiis dep pikir bildirdi.
Resei Prezidenti atap ótkendei, Qyrǵyzstan buǵan deiin birneshe ret ishki saiasi shielenisti bastan keshti, qazir elge turaqtylyq kerek, dep habarlaidy Sputnik agenttigi RIA Novosti-ǵa silteme jasap.
"Qyrǵyzstan bizdiń odaqtasymyz, bizge jaqyn memleket. Qyrǵyzstanda buǵan deiin birneshe ret kúrdeli ishki saiasi tolqynys boldy, dálirek aitsaq, kem degende eki ret. Meniń oiymsha, Qyrǵyzstan halqynyń múddesi úshin mundaidy qoiý kerek", - deidi Pýtin.
Onyń aitýynsha, respýblika turǵyndary qazirgi prezident Sooronbai Jeenbekovtiń tóńireginde toptasýy tiis.
"Elge saiasi turaqtylyq qajet. Búkil halyq qazirgi prezidenttiń tóńireginde toptasyp, memleketti damytýǵa kómektesýi tiis", - dedi Pýtin.
Resei Memleket basshysy Kremde Qyrǵyzstannyń burynǵy prezidenti Almazbek Atambaevpen kezdesip, eldegi jáne aimaqtaǵy ahýal týraly sóileskenin habarlady.
Eske sala ketsek, Atambaev 24 shildede arnaiy ushaqpen Máskeýge attandy. Ol Qyrǵyzstanǵa 25 shildede oralady.
Maýsym aiynda Qyrǵyzstan Parlamenti Jogorký Kenesh alty qylmystyq iske qatysy bar Almazbek Atambaevty eks-prezident mártebesinen aiyrdy. Sóitip, burynǵy memleket basshysy eshkimniń tiispeýi jónindegi quqyǵynan aiyryldy.
Almazbek Atambaevqa Qoi-Tas aýylynda jer telimin zańsyz aldy, qylmystyq álemniń serkesi A. Batýkaevty zańsyz bosatty, Sýbihi Parhatidiń "Forým" ǵimaratyn alaiaqtyq jolmen satty, Bishkek qalasyndaǵy JES-ti rekonstrýktsiialaý men oǵan kómir satyp alý jumystary kezinde sybailas jemqorlyqqa jol berdi degen aiyptar taǵylyp otyr.
