Ózbekstan men Resei arasyndaǵy kelisimdi ratifikatsiialaý týraly Resei ishki ister ministrligi jasaǵan zań jobasy boiynsha eki eldiń azamattary shekaradan ótkennen keiin 15 kúnge deiin tirkelmei-aq júre berýine bolady.
Qazir Resei mundai ruqsatty Qazaqstan, Belarýs, Qyrǵyzstan, Armeniia jáne Tájikstan azamattaryna berip otyr.
Ózbekstan men Resei arasyndaǵy kelisimge 21 mamyrda Máskeýde, 17 maýsymda Tashkentte qol qoiylǵan.
"Bul kelisim Resei men Ózbekstannyń dostyq qatynasyn ári qarai da damyta túsedi", — delingen qujatta.
Buǵan deiin Resei Ózbekstannyń 158 myń azamatyna "migratsiia raqymshylyǵyn" jasaidy degen habar taraǵan. Olarǵa túrli sebeptermen Resei aýmaǵyna kirýge tyiym salynǵan.
Jumys kúshi tapshylyǵy ańǵaryla bastaǵan soń Resei biligi Ózbekstannyń myńdaǵan jumys qolyn tartýǵa sheshim qabyldaǵan.
