Ishki ister ministrligi politsiia Resei nómirin taqqan kólikterdi nelikten tekserip jatqanyn túsindirdi, dep habarlaidy Sputnik Qazaqstan.
Ákimshilik politsiia komiteti tóraǵasynyń orynbasary Serik Túsipovtyń aitýynsha, tamyz aiynan beri kórshi elderden keletin kólikterdi tekserý sharalary atqaryldy. Ishki ister ministrligi, ulttyq qaýipsizdik komiteti men memlekettik kirister komitetiniń mamandary reseilik nómirmen júrgen avtomobilderge basa nazar aýdardy.
"Sol kezde bizge biraz kriminaldyq kólik ákelingeni anyqtaldy. Olar tirkeýden shyǵarylǵan. Jalǵan qujat negizinde 10 kólikti kirgizý faktisin ulttyq qaýipsizdik komitetimen birlesip anyqtadyq. Budan bólek, 150 kólikti Resei Federatsiiasynda tirkeýden shyǵaryp tastaǵan", - deidi Túsipov.
Osydan keiin ishki ister ministrligi Qazaqstanda reseilik nómirmen júrgen kólikter týraly qajetti aqparatty saqtandyrý kompaniialarynan aldyrtty. Reseidiń ishki ister organdaryna da suraý salyndy. Ol jaqta Qazaqstanda júrgen 88 myń kóliktiń tirkeýde turmaǵany rastaldy.
"Bul degenimiz, ol kólikter zań boiynsha tirkelmegen, ia bolmasa, Qazaqstan azamattaryna satylǵannan keiin burynǵy ieleri – Resei azamattary tirkeýden shyǵaryp tastaǵan. Al zań boiynsha tirkelgen kólikter ǵana jol qozǵalysyna qatysa alady. Qazirgi kezde osy sanattaǵy kólik ielerimen tiisti jumystar atqarylyp jatyr", - dep atap ótti Túsipov.
Onyń aitýynsha, reseilik kólikter tiisti qujattary men naqty tirkeýi bolsa, júre beredi. Biraq zańda kórsetilgen merzimdi saqtaý qajet. Ondai kólikterdi jyl saiyn tirkelgen jerine aparyp otyrý kerek.
"Sosyn Resei Federatsiiasynyń ishki ister ministrligi Qazaqstanda júrgen 606 kóliktiń izdeýge jariialanǵany týraly aqparat berdi. Bul degenimiz, ol kólikterdiń belgili bir qylmysqa qatysy bar, ia bolmasa, sol qylmystyń nysany bolyp sanalady. Biz ondai kólikterdi anyqtaý jumystaryn júrgizip jatyrmyz. Osy ýaqytqa deiin 200 kólik tabyldy", - dedi Túsipov.
Qazirgi kezde kriminaldyq kólikter týraly barlyq aqparat izdeý jariialaǵan mekemelerge jiberildi. Sonyń negizinde protsessýaldyq sheshim shyǵarylady. Ustalǵan kólikter ázirge aiyp turaǵynda tur.
Aldaǵy ýaqytta eki eldiń aqparat bazasyn integratsiialaý josparlanyp otyr. Sonyń arqasynda tirkeýde turmaǵan kólikter avtomatty túrde anyqtalady.
