Reseidiń birqatar qalalarynda jeksenbide jemqorlyqqa qarsy sherýler ótip jatyr. Buǵan deiin ondaǵan qalada uiymdastyrýshylar sherý ótkizýdi josparlap otyrǵandaryn málimdegen. Kóptegen qalada jergilikti bilik ruqsat etpegenine qaramastan adamdar narazylyq aktsiiasyna shyqqan.
Solardyń biri búgin Qiyr Shyǵys aimaǵynyń ortalyǵy Vladivostok qalasynda ótken. Jergilikti belsendiler men jýrnalisterdiń aitýynsha, júzdegen adam shyqqan sherý bastalysymen oǵan qatysýshylardy politsiia jappai ustai bastaǵan. Kei málimetter boiynsha, Vladivostokta búgin 40-qa jýyq adam ustalǵan.
Novosibirsk qalasynda biliktiń kelisimi alynǵan sherýge eki myńnan asa adam jinaldy dep habarlap jatyr jergilikti baspasóz quraldary. Krasnoiarsk qalasynda jemqorlyqqa qarsylyq aktsiiasyna myńǵa tarta adam shyqqan. Tomsk, Irkýtsk men Cheliabinskidegi sherýlerge júzdegen adam qatysqan.
Buǵan deiin Máskeý biligi qala ortalyǵynda sherý ótkizý týraly uiymdastyrýshylar ótinishin qanaǵattandyrýdan bas tartyp, aktsiiany qalanyń shetkeri aimaǵynda ótkizýdi usynǵan. Buǵan kelispegen oppozitsiialyq saiasatker Aleksei Navalnyi korrýptsiiaǵa qarsy sherý Máskeý ortalyǵyndaǵy Tver kóshesinde ótýi tiis dep málimdegen. Qazir Máskeýdiń Tver kóshesi mańyn politsiia baqylaýǵa alyp, sol mańaidaǵy keibir metro stantsiialary qasyna ondaǵan politsiia kólikteri qoiylǵan dep habarlady Azattyqtyń Orys qyzmeti.
Aleksei Navalnyi jetekshilik etetin korrýptsiiamen kúres qory naýryzdyń 2-si kúni jariialaǵan zertteý qorytyndysynda «premer-ministr Dmitrii Medvedevtiń Reseidegi jáne sheteldegi zańsyz jolmen kelgen qymbat jyljymaityn dúnie-múlki» týraly derekter keltirilgen. Navalnyi Medvedevti «senimdi adamdary basqaratyn qaiyrymdylyq qorlary negizinde san qatpardan turatyn korrýptsiialyq jeli qurǵan» dep aiyptady. Resei úkimeti bul aqparatty «úgit-nasihatty kózdeitin daýryqpa» dep atap, oǵan qatysty túsinikteme berýden bas tartqan soń Navalnyi jaqtastaryn naýryzdyń 26-sy kúni jemqorlyqqa qarsy sherýge shyǵýǵa shaqyrǵan.
