Reseidiń kólik politsiiasy oppozitsiialyq saiasatker Aleksei Navalnyidyń aýrýhanaǵa túsýine bailanysty tekserý jumystaryn bastady. Bul týraly ishki ister ministrligi habarlady. Kólik prokýratýrasy da oqiǵany zerttei bastaǵan.
Resmi aqparat boiynsha, politsiia saiasatker toqtaǵan Tomskidegi qonaq úidi qarap, "júzden astam zat" tárkilegen, video kameralardaǵy derekti saralaǵan. Vedomstvo ázirge "aǵzaǵa qatty áser etetin nemese esirtki zattary" tabylmady dedi.
Resei prezidenti Vladimir Pýtinniń qarsylasy, jemqorlyqqa qarsy naýqan júrgizgen Aleksei Navalnyi 20 tamyzda Tomskiden Máskeýge bara jatqan ushaqtyń ishinde esinen talyp, artynan komaǵa túsken. Navalnyi ushaqqa otyrmas buryn Tomsk áýejaiynda bir kese shái ishken. Onyń jaqtastary sol sháiǵa ý qosylǵan dep sanaidy. Al ony Ombyda emdegen dárigerler buǵan deiin zat almasý protsesiniń buzylǵanyn, aǵzasynan qaýipti zat tabylmady dep habarlaǵan bolatyn.
22 tamyzda saiasatkerdiń týystary men jaqtastarynyń ótinishi boiynsha Navalnyi Germaniiadaǵy "Sharite" klinikasyna aýystyrylǵan. Osy apta basynda nemis dárigerleri onyń aǵzasynan qaýipti zat tabylǵanyn habarlaǵan.
Buǵan deiin saiasatkerdiń otbasy men jaqtastary "qoǵam belsendisiniń ómirine qastandyq jasaý" baby boiynsha qylmystyq is qozǵaýdy talap etken. Vladimir Pýtinniń baspasóz hatshysy Dmitrii Peskov oqiǵanyń mán-jaiy tolyq aiaqtalmaiynsha is qozǵaýǵa negiz joq dep aitqan edi.
Batys elderi Resei biligin Navalnyidyń ýlanýyn jan-jaqty zertteýge shaqyrǵan. AQSh pen Eýroodaq oppozitsiialyq saiasatkerdiń ýlanýyna biliktiń qatysy bary rastalsa, sanktsiia salatynyn aityp eskertken.
