Resei Eýropa odaǵynyń úsh diplomatyn "persona non grata" dep jariialap, olardan tez arada Resei aýmaǵynan shyǵýdy talap etti. Bul jóninde juma kúni Reseidiń syrtqy ister ministrligi habarlady.
Vedomstvo habaryna sensek, Shvetsiia men Polshanyń Sankt-Peterbýrgtegi konsýldyqtarynyń qyzmetkerleri, Germaniianyń Máskeýdegi elshiliginiń ókili 23 qańtardaǵy "zańsyz sharalarǵa qatysqan". "Bul áreketteri orynsyz ári olardyń diplomatiialyq mártebesine sai kelmeidi. Diplomatiialyq qatynastar týraly 1961 jyldyń 18 sáýirindegi Vena konventsiiasyna sáikes, zańsyz sharalarǵa qatysqan diplomattar "persona non grata" dep jariialandy" delingen ministrlik habarynda. Resei syrtqy ister ministrligi sheteldik dipmissiia ókilderin "halyqaralyq quqyq normalaryna qatań baǵynýǵa" shaqyrǵan.
Sońǵy aptalarda Reseide túrmege qamalǵan oppozitsiialyq saiasatker Aleksei Navalnyidy bosatýdy talap etken birneshe narazylyq ótip, myńdaǵan adam qamaýǵa alynǵan.
Eýroodaq Reseidi diplomattardy shyǵaryp jiberý týraly sheshimin qaita qaraýǵa shaqyrdy. Frantsiia prezidenti Emmanýel Makronmen birge ótken baspasóz máslihatynda Germaniia kantsleri Angela Merkel Berlin men Parij Máskeýdiń bul sheshimin orynsyz dep tanitynyn aitty. Shvetsiia syrtqy ister ministrligi óz diplomatiialyq ókildigi qyzmetkeri ruqsat etilmegen sharaǵa qatysty degen aqparatty joqqa shyǵardy. Polsha sheshimniń kúshi joiylatynyna úmit etetinin aitty jáne buǵan qarymta sharalar qoldanylýy múmkin ekenin eskertti.
Máskeýde júrgen Eýroodaqtyń syrtqy ister vedomstvosynyń basshysy Jozep Borrel Resei syrtqy ister ministri Sergei Lavrovpen kelissózde Navalnyidy jáne ony qoldaý sharalary kezinde ustalǵandardy bosatý máselesin taǵy da kóterdi.
Munyń aldynda Eýroodaq Reseidegi beibit sharalarǵa qatysqan adamdardyń quqyqtary buzylǵanyna alańdaýshylyq bildirgen.
