Reseidiń Aýǵanstandaǵy elshisi Dmitrii Jirnov "Eho Moskvy" radiostantsiiasynyń efirinde "prezident Ashraf Ǵanidyń kezindegiden góri terroristerdiń kezindegi jaǵdai jaqsyraq" dep málimdedi.
"Muny tálipter Kabýldy baqylaýǵa alǵannan keiingi alǵashqy táýlikte baiqaǵanym boiynsha aityp otyrmyn" degen ol Resei diplomatiialyq missiiasynyń qaýipsizdigi máselesin talqylaý úshin "Taliban" ókilderimen jolyǵýdy josparlap otyrǵanyn aitty. Jirnov tálipterdiń bul máselege "aiqyn, jaqsy, unamdy jáne isker" ustanym turǵysynan qaraitynyn atady. Ol sózin "bizdiń ózara túsinistik tabýǵa kedergi bolatyn nárse kórmei turmyn" dep qorytty.
Buǵan deiin tálipter Resei elshiliginiń qaýipsizdigine kepildik bergeni týraly habar taraǵan.
Birneshe elde terror uiym retinde tyiym salynǵan "Taliban" radikaldy islam qozǵalysynyń ókilderi jeksenbi kúni Aýǵanstan astanasy Kabýldy soǵyssyz baǵyndyryp, prezident saraiyn alǵan. "Gýmanitarlyq apatqa jol bergisi kelmeitinin" aitqan prezident Ashraf Ǵani Aýǵanstannan ketken. Osylaisha Aýǵanstan tolyǵymen tálipter baqylaýyna ótken.
1996-2001 jyldary "Taliban" Aýǵanstannyń basym bóligin baqylaýynda ustaǵan bolatyn. 2001 jyly AQSh pen odaqtastarynyń áskeri operatsiialarynan soń olar mundai múmkindiginen aiyrylǵan.
Tálipterdiń Kabýldy alýyna bailanysty qala áýejaiynda dúrbeleń bastalǵan. Tálipter qýǵyn-súrginge salýy múmkin dep qaýiptengen myńdaǵan adam Aýǵanstannan ushyp ketý úshin jantalasqan. Keibiri áýege kóterile bastaǵan ushaq shassiine jarmasqan. Reuters agenttiginiń aqparatynsha, dúisenbi kúngi áýejaidaǵy dúrbeleń kezinde kem degende bes adam ólgen.
