Resei Bas prokýratýrasy Frantsiianyń memlekettik keńesiniń qazaqstandyq burynǵy bankir Muhtar Ábliazovtiń RF-ǵa berýge saiasi sebepter boiynsha suralyp otyrǵany týraly tujyrymymen kelispedi, - dep habarlaidy RIA Novosti reseilik baqylaý vedomstvosynyń resmi ókili Aleksandr Kýrennyiǵa silteme jasap.
Bas prokýratýra ókilderiniń aitýynsha, 2016 jyldyń 9 jeltoqsanynda Frantsiianyń Memlekettik keńesi osy eldiń premer-ministriniń Ábliazov Muhtar Qabylulyn berý týraly 2015 jyldyń 17 qyrkúieginde qol qoiylǵan dekretin joidy. Buǵan negiz retinde Memlekettik keńes Ábliazovti berý saiasi maqsattarda suralǵanyn aitty.
"Resei Federatsiiasynyń bas prokýratýrasy bul sheshimdi negizsiz dep esepteidi, halyqaralyq quqyq normalaryna sáikes kelmeidi, sondai-aq frantsýz sottarynyń buǵan deiin shyǵarǵan sheshimderine qaishy", - dedi Kýrennyi.
Aita keteiik, 9 jeltoqsanda Frantsiianyń Memlekettik keńesi Muhtar Ábliazovti Reseige ekstraditsiialaý týraly qaýlynyń kúshin joidy. Tutqyndalǵan biznesmendi Reseige berý týraly jarlyqqa eldiń premer-ministri Manýel Vals 2015 jyldyń qyrkúieginde qol qoiǵan bolatyn, alaida Ábliazovtiń advokattary apelliatsiialyq shaǵym túsirgen edi.
"Ábliazovtiń ekstraditsiiasy saiasi maqsattarda suralǵan deýge negizder bar nemese osydan onyń saiasi jaǵdaiy nasharlaýy múmkin", - dep málimdedi Memkeńestiń otyrysynda baiandama jasaǵan adam.
AFP málimetinshe, Memkeńes mundai qadamǵa buǵan deiin bir-aq ret barǵan. Ol kezde ispan oppozitsionerin Franko biligi suraǵan bolatyn.
Osydan keiin týystary Ábliazovtiń bosap shyqqanyn habarlady.
Eske salaiyq, qazaqstandyq BTA Banktiń burynǵy basshysy Ábliazov 2013 jyldyń shildesinde frantsýzdyń Alp taýlarynda ustalyp, sodan beri Parijdiń ońtústigindegi Fleri-Meroji kommýnasyndaǵy abaqtyda jatqan. Ol birqatar qylmys jasady dep aiyptaldy, sol aiyptardyń ishinde alaiaqtyq, qujattardy qoldan jasaý, ókilettikti teris maqsatta paidalaný baptary bolǵan. Al onyń keltirgen jalpy shyǵyny birneshe milliard dollarǵa baǵalanǵan.
Ábliazovtiń bank basshylyǵyndaǵy qyzmeti Reseide, Qazaqstanda jáne Ýkrainada qylmystyq qýdalaýǵa ushyrady, alaida eks-bankirdi Resei men Ýkraina ǵana surap otyr, sebebi Astana men Parij arasynda ekstraditsiia týraly kelisim joq. Ábliazovqa qatysty is 2009 jyly qozǵalǵan edi, sodan beri ol Qazaqstannan qashyp ketip, kóp ýaqyt boiy Ulybritaniiada ómir súrdi, keiin bul elden de ketýge májbúr boldy.
