Shyǵys Qazaqstan oblysynda 3 jyl boiy Qazaqstan azamaty retinde zeinetaqy alyp kelgen reseilik anyqtaldy, dep habarlaidy QazAqparat.
ShQO Politsiia departamenti baspasóz qyzmetiniń málimetinshe, kóshi-qon qyzmetiniń mamandary óńir aýmaǵynda qos azamattyǵy bar adamdardy anyqtaý boiynsha kúndelikti jumys júrgizýde. Sonyń nátijesinde, jyl basynan beri qos azamattyqpen júrgen 60-tan astam adam tirkelgen.
«4 qazanda zeinetaqy tóleý jónindegi memlekettik ortalyqpen salystyrý kezinde 19 jyl buryn Resei Federatsiiasynyń azamattyǵyn alǵan Glýbokoe aýdanynyń 66 jastaǵy turǵyny anyqtaldy. Er adam 16 jyl boiy Reseide zeinetaqy alyp, 2018 jyly zeinetkerlik jasqa tolǵannan keiin Qazaqstan aýmaǵynda da zeinetaqy resimdegen. Qazirgi ýaqytta zańsyz alynǵan qarajatty óndirip alý máselesi qarastyrylýda», - delingen habarlamada.
Vedomstvo dereginshe, basqa eldiń azamattyǵyna kiretin adam qazaqstandyq azamattyqtan bas tartýy qajet. Ol úshin 30 kúndik merzimde ishki ister organdaryna basqa memlekettiń azamattyǵyn alǵany týraly habarlap, Qazaqstannyń tólqujaty men jeke kýáligin tapsyrýy tiis.
«Ókinishke qarai, óńirdiń kei turǵyndary bul talapty elemeidi. Qos azamattyqpen júrýdiń negizgi sebepteriniń biri – karantindik shekteýler kezeńinde memlekettik shekarany kedergisiz kesip ótý. Qazaqstan azamattarynyń qujattaryn paidalanǵany úshin sheteldikterge QR ÁQBtK-niń 496-babyna sáikes 100 AEK kóleminde aiyppul salynady», - dedi oblystyq PD kóshi-qon qyzmeti basqarmasynyń bastyǵy Erbol Bekpaev.
