Jeksenbi, 5 maýsym kúni tańerteń Resei áskeri Ýkraina astanasy Kievke zymyranmen soqqy jasady, dep habarlaidy Azattyq.
Jarylys qalanyń Darnitsk jáne Dneprovsk aýdandarynda bolǵan. Bul jóninde qala meri Vitalii Klichko telegram arnasynda málimdedi.
Atalǵan aýdandar Dneprdiń sol jaǵalaýynda ornalasqan. Ázirge tolyq emes málimet boiynsha, qaza bolǵandar joq, bir adam aýrýhanaǵa túsken.
Ýkraina prezidenti keńsesiniń ókili Sergei Leshenko negizinen temir jol infraqurylymyna soqqy jasalǵanyn aitty. Alaida naqty qai nysanǵa shabýyl jasalǵany belgisiz.
Ýkrainanyń "Energoatom" kásipornynyń málimetine sáikes, Kievke jiberilgen qanatty zymyrandardyń biri "óte tómen" ushyp, Nikolaev oblysyndaǵy atom elektr stantsiiasyna tie jazdaǵan.
Resei qorǵanys ministrligi ázirge zymyran soqqylaryna qatysty aqparat taratpady. Sońǵy ret Kievke zymyrandar sáýir aiynda ushyrylǵan edi.
Sondai-aq, Donetsk oblysy Kramatorsk qalasynyń meri jeksenbige qaraǵan túni qaladaǵy eki ónerkásip nysanyna áýeden soqqy jasalǵanyn aitty. Al oblys ákimshiliginiń jetekshisi Pavel Kirilenko 4 maýsymda zymyran atqylaýynyń saldarynan aimaqta alty adam qaza bolǵanyn habarlady.
Buǵan qosa Dnepropetrovsk oblysynyń Krivorojsk aýdany artilleriia soqqysyna ushyraǵan.
Reseidiń kremlshil aqparat quraldarynyń tilshileri jáne "Donetsk halyq respýblikasyndaǵy" separatister senbi kúni Donetsk ortalyǵynyń atqylaýǵa ushyraǵanyn habarlady. Turǵyn úiler búlingen, jaralanǵandar bar.
Qazir Ýkrainada keskilesken shaiqas Donetsk jáne Lýgansk oblystarynda, onyń ishinde Severodonetsk, Bahmýt jáne Slaviansk qalalarynda júrip jatyr. Ýkrainada Resei basqynshylyǵynyń jalǵasyp jatqanyna 5 maýsymda 102 kún boldy.
