Mádeni qundylyqtardy zańsyz shyǵarǵandarǵa qatysty jeke bap qarastyrylmaq. Bul týraly QR Bas prokýrorynyń orynbasary Marat Ahmetjanov aitty, dep habarlaidy "Ult aqparat".
«Zań jobasyna QR aýmaǵynan mádeni qundylyqtardy zańsyz shyǵarǵany úshin jaýapkershilik júkteledi. Resei men Qazaqstan shekarasyndaǵy kedendik baqylaýdy ońtailandyrý nátijesinde týyndaǵan qiyndyqtardyń kesirinen eki aradaǵy mádeni qundylyqtardyń zańsyz tasymalynyń naqty aýqymyn anyqtaý múmkin bolmai otyr. Reseilik áriptesterimiz biz usynyp otyrǵan bapty ózderinde engizip qoiǵan. Endi biz de qabyldap, birlesip áreket etýimiz kerek» - dedi ol Ortalyq kommýnikatsiialar qyzmetinde ótken baspasóz máslihatynda.
