Resei ishki ister ministrliginiń kóshi-qon máseleleri jónindegi basqarma basshysy Valentina Kazakova 30 qyrkúiekten keiin zańsyz júrgen migranttar elden shyǵarylady dep eskertti.
Biyl maýsym aiynda prezident Vladimir Pýtin migranttardyń elde ýaqytsha júrý merzimin 30 qyrkúiekke deiin uzartý jóninde buiryq shyǵarǵan. Osy merzimge deiin migranttar qujattaryn rettep alýy tiis bolǵan.
Reseidegi kóshi-qon federatsiiasynyń basshysy Vadim Kojenov "Kommersant" gazetine migratsiialyq ortalyqtarda kezektiń óte kóptigin aitqan. Al "Azamattyq kómek" komitetiniń jetekshisi Svetlana Gannýshkina uiymǵa júzdegen adam kelip shaǵymdanǵanyn jetkizdi.
Onyń sózinshe, migranttardyń kóbi resmi tirkele almai keledi. Olardiń deni - aýǵandyqtar. "Eger bizdi elge deportatsiialasa, tálipter bizdi jazalaidy" dep qorqyp jatyr deidi.
Valentina Kazakovanyń sózinshe, qazir Reseide 7 mln migrant bar. Ádette 11 mln-ǵa deiin bolady. Biraq pandemiia saldarynan olardyń sany qysqarǵan.
Resei IIM málimetinshe, zańsyz migranttardyń 332 myńy Ózbekstannan kelgen, 247 myńy Tájikstannan, 152 myńy Ýkrainadan, 120 myńy Ázerbaijannan, 115 myńy Qyrǵyzstannan, 61 myńy Armeniiadan, 56 myńy Moldovadan jáne 49 myńy Qazaqstannan kelgen.
