3 shilde kúni Qazaqstanda koronavirýspen 3003 naýqas tirkeldi. Bul – buryn-sońdy bolmaǵan kórsetkish.
Aimaqtar arasynda ádettegidei Nur-Sultan kósh bastap tur. Qazaqstan astanasynda bir kúnde 791 adamnan koronavirýs anyqtalǵan. Biraq bul - qalanyń rekordy emes. Rekord 30 maýsym kúni ornaǵan. Sol kúni onda 807 naýqas tirkeldi. Nur-Sultanda biylǵy naýryzdyń ortasynan beri kúndelik anyqtalatyn naýqas sany 100-den tómen túspegen.
Sodan keiingi orynda Qaraǵandy oblysy tur. Onda 496 naýqas anyqtalǵan. Bul – oblystyń rekordy. Oblysta úshinshi kún qatarynan tórt júzden astam naýqas tirkelip otyr.
Bir kúnniń deregi boiynsha, tirkelgen naýqas sany júzden asqan oblystar qatarynda: Almaty qalasy (391), Mańǵystaý oblysy (186 adam), Batys Qazaqstan oblysy (173), Shymkent (169), Atyraý oblysy (154), Almaty oblysy (112) jáne Aqmola oblysy (105) bar.
Qazaqstanda maýsymnyń ortasynan beri indettiń taraýy qaita kúsheidi. El biligi muny "delta" variantynyń taralýymen túsindiredi. Alǵash ret Úndistanda tirkelgen "delta" qazir álem boiynsha dominant variantqa ainaldy. Ol virýstyń bastapqy variantyna qaraǵanda edáýir juqpaly jáne onyń ólim qaýpi joǵaryraq.
Qazaqstannyń epidemiialyq kartasynda "qyzyl aimaqta" sanaýly apta buryn tek Nur-Sultan ǵana bolsa, qazir onda Almaty, Shymkent qalalary, Aqmola, Atyraý, Batys Qazaqstan, Qaraǵandy, Mańǵystaý jáne Pavlodar oblystary bar.
3 shildedegi málimet boiynsha, 28 575 adam koronavirýs infektsiiasynan (–27 231 + jáne 1344 KVI-) emdelip jatyr. Olardyń ishinde 8 640 patsient statsionarda, 19 935 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 541 adamnyń jaǵdaiy aýyr,
• 117 patsienttiń jaǵdaiy óte aýyr,
• 72 naýqas ÓJJ apparatynda jatyr.
Elde vaktsinalaý naýqany 1 aqpanda bastalǵan. Ázirge densaýlyq saqtaý ministrliginiń quzyretinde tórt túrli vaktsina bar. Olar: reseilik "Spýtnik V", qazaqstandyq QazVac, Qytai ázirlep, BAÁ óndirgen Hayat-Vax jáne qytailyq CoronaVac. Biraq sońǵy úsheýiniń úlesi az, azamattar negizinen reseilik ekpeni saldyryp jatyr. Reseidiń bul vaktsinasyn Qaraǵandyda da óndiredi.
Resmi aqparat boiynsha, osy kúnge deiin vaktsinanyń kemi bir dozasyn 3,7 million adam alǵan. Onyń 2,2 millionǵa jýyǵy ekinshi dozany da alyp úlgergen.
Qazaqstanda osylaisha indet bastalǵaly barlyǵy 433 931 adamnyń analizinen koronavirýs anyqtalǵan. Budan bólek, 1 tamyzdan beri koronavirýs juqtyrǵany PTR testimen rastalmaǵan, biraq aýrý belgileri boiynsha soǵan uqsaityn pnevmoniia esebi de júrgizilip keledi. 1 shildege deiin pnevmoniianyń bul túrimen 57 276 naýqas tirkelgen.
Djons Hopkins ýniversiteti saityndaǵy sońǵy málimetke sáikes, álem elderinde barlyǵy 183 mln 407 myń 614 adamnan koronavirýs anyqtaldy. Onyń ishinde virýstan qaitys bolǵandar sany – 3 mln 969 myń 700 naýqasty qurady.
Koronavirýs eń kóp taraǵan elderdiń alǵashqy bestiginde: AQSh, Úndistan, Braziliia, Frantsiia, Resei ornalasqan.
