Qazaqstanda keiingi táýlikte 3130 adamnan koronavirýs tabylǵanyn 10 shildede densaýlyq saqtaý ministrligi habarlady. Osylaisha, pandemiia bastalǵaly beri virýs juqtyrǵandar sany boiynsha taǵy bir rekord tirkeldi.
Keiingi málimette 8 shildede elde koronavirýstan – 33, "koronavirýs pnevmoniiasynan" 5 adam qaitys bolǵany aitylǵan.
Qazaqstanda koronavirýstyń asa juqpaly "delta" shtamy tarap jatqan tusta, shildeniń basynan beri táýlik saiyn anyqtalatyn koronavirýs juqtyrǵandar sany úsh myńnan asyp otyr.
Resmi derek boiynsha, Qazaqstanda byltyrǵy naýryzdan beri 451 130 adamnan koronavirýs anyqtalǵan. Biraq keibir sarapshylar eldegi shynaiy jaǵdai basqasha - virýs juqtyrǵandar budan áldeqaida kóp dep sanaidy.
Qazir elde Nur-Sultan, Almaty, Shymkent qalalary, Aqmola, Aqtóbe, Atyraý, Batys Qazaqstan, Qaraǵandy, Mańǵystaý jáne Pavlodar oblystary virýs juǵý qaýpi kóp "qyzyl aimaqta", Almaty, Jambyl, Qostanai, Qyzylorda jáne Soltústik Qazaqstan oblystary virýs taraýy jaǵynan ortasha "sary aimaqta" tur. Shyǵys Qazaqstan jáne Túrkistan oblystary – "jasyl aimaqta".
8 shildede elde 112 adamǵa koronavirýs pnevmoniiasy degen diagnoz qoiyldy. PTR nátijesi teris, biraq simptomdary koronavirýsqa uqsas "pnevmoniia" statistikasy byltyr tamyzdan beri júrgizilip keledi. Ministrlik málimetinshe, sodan beri elde 57 742 adam osy "pnevmoniiaǵa" shaldyqqan.
Resmi derekke sai, pandemiia bastalǵaly Qazaqstanda 4609 adam koronavirýstan, 3486 adam "pnevmoniiadan" qaitys bolǵan. Biraq bul statistikaǵa koronavirýs juqtyrǵany anyqtalǵan myńnan asa marqum enbei qaldy. Ministrlik qurǵan komissiia olardyń qazasyna basqa dert sebep boldy dep tapqan.
Ministrliktiń dereginshe, 9 shildege deiin elde 4,2 millionnan astam adam koronavirýsqa qarsy ekpeniń bir dozasyn; 2,38 milliondai adam eki dozasyn da alǵan. Elde reseilik "Spýtnik V", qazaqstandyq QazVac, HayatVax (BAÁ elinde daiyndalǵan Qytaidyń ekpesi), qytailyq Coronavac ekpesin salyp jatyr.
Qazirgi kezde Qazaqstanda koronavirýs juqtyrǵan 37 myńnan astam adam emdelip jatyr, onyń 12 myńǵa jýyǵy statsionarda jatyr.
AQSh-taǵy Djons Hopkins ýniversitetiniń dereginshe, qazirge deiin álemde 186 millionǵa jýyq adamǵa koronavirýs juǵyp, tórt millionnan astam naýqas kóz jumǵan.
