Mádeniet jáne sport ministri Aqtoty Raiymqulova QR Prezidenti janyndaǵy Ulttyq qoǵamdyq senim keńesi múshelerimen jiyn ótkizdi, dep habarlaidy "Ult aqparat" ministrliktiń baspasóz qyzmetine silteme jasap.
Kezdesýge Ulttyq qoǵamdyq senim keńesi Áleýmettik-mádeni jańǵyrtý máseleleri jónindegi jumys toby músheleri qoǵam qairatkeri, «Nur Otan» partiiasy respýblikalyq qabyldaýynyń konsýltanty Aýyt Muqibek, Qazaqstan Respýblikasy Parlamenti Májilisiniń depýtaty Jambyl Ahmetbekov, Qoǵam qairatkeri, «Qazaq úni» JShS prezidenti Qazybek Isa, Quqyq qorǵaý qairatkeri Aigúl Orynbek keldi.
Sonymen qatar, alqaly jiynǵa Ministrliktiń mádeniet jáne sport máseleleri jónindegi qoǵamdyq keńes músheleri: TMD Parlamentaralyq assambleiasynyń múshesi, L.N.Gýmilev atyndaǵy Eýraziia ulttyq ýniversitetiniń, Qazaqstan halqy Assambleiasy kafedrasynyń meńgerýshisi Anatolii Bashmakov; QR Mádeniet, sport, týrizm jáne aqparat qyzmetkerleriniń salalyq kásipodaǵynyń tóraiymy Svetlana Imanqulova jáne mádeniet jáne sport salasynyń qairatkerleri qatysty.
Qazaqstan Respýblikasynyń Ulttyq akademiialyq kitaphanasyndaǵy jiynda mádeniet jáne sport, týrizm salasy boiynsha qazirgi tańda qordalanyp qalǵan máselelerge Mádeniet jáne sport ministrliginiń basshylyǵy jáne qurylymdyq bólimsheler basshylary sondai-aq Mádeniet jáne sport ministrligine vedomstvolyq baǵynysty uiymdardyń basshylary jaýap berdi.
Ulttyq qoǵamdyq senim keńesi músheleriniń mádeniet, óner, týrizm, til saiasatynyń damýy boiynsha usynystary keńinen talqylandy.
Mádeniet jáne sport ministri Aqtoty Raiymqulova Memleket basshysynyń bastamasymen qurylǵan Ulttyq qoǵamdyq senim keńesiniń múshelerine osynaý kezdesýge kelgenderi úshin alǵys aita otyryp: «Memleket basshysy jańǵyrý qoǵamdyq pikirdi tolyq zerttep alǵan soń ǵana bastalatynyn, qoǵamdy alańdatqan ózekti máselelerdiń barlyǵy egjei-tegjeili qaralyp, sheshimin tabýy tiis ekenin aitqan bolatyn», dedi.
Osy rette A.Raiymqulova ministrliktiń kez kelgen qyzmetkeri ult taǵdyryna alańdap, ózindik usynys pikir bildiretin el azamattarynyń ótinishin tyńdaýǵa árqashan daiyn ekenin jetkizdi.
Qazirgi tańda qazaq qoǵamyn alańdatyp otyrǵan memlekettik til máselesi ekeni daýsyz. Ulttyq qoǵamdyq senim keńesi múshesi Qazybek Isa: «Memlekettik qyzmetke ótinish bergen talapker ult tilinde sóileýi kerek»,dedi. Bul pikirdi qoǵam belsendisi, alashtanýshy ǵalym Sultanhan Aqqululy qýattai kele: «Elbasy Nursultan Nazarbaevtyń tapsyrysy boiynsha 2025 jylǵa deiin latyn álipbiine kóshý kún tártibinde turǵan ózekti taqyryp. Osy oraida, jańa álipbidi jasaýda kezinde Ahmet Baitursynuly qurastyrǵan nusqany esepke alsa eken deimin. Sebebi, bul tilimizdegi kirme áripterden arylýǵa kómegin tigizedi. Sonymen qatar qazir aty-jón jazýdy bir izdilikke salatyn kez keldi dep esepteimin. Sebebi, munyń ózi mádeniettiliktiń belgisi»,-dep aitty.
Osy aitylǵan máselelerge QR mádeniet jáne sport ministrliginiń Til saiasaty komitetiniń basshysy Ǵalymjan Meldeshov jaýap berdi.
«Qazir Ahmet Baitursynuly atyndaǵy til bilimi institýtynyń ǵalymdary latyn álipbiiniń birneshe úlgisin jasap shyqty. Oǵan qosa qazir til ǵalymdary emle máselesi boiynsha da tynbai jumys istep jatyr. Qandai da bir ortaq mámilege keletinimizge senemin»,-dedi.
Qoǵam qairatkeri, «Nur Otan» partiiasy respýblikalyq qabyldaýynyń konsýltanty Aýyt Muqibek qazaq mádenieti ulttyń máiegi ekenin aita kele osy baǵytta atqarylyp jatqan ister týraly saýal qoidy.
Ministr Aqtoty Rahmetollaqyzy elimizdiń Mədeni damýynyń 2020-2030 jyldarǵa arnalǵan strategiiasy bastaǵan onshaqty jobany tanystyrdy.
Bul baǵytta mańyzdy usynys bildire alatyn tulǵalardyń tizimi jasaqtalyp jatqanyn, tizim áli tolyqtyrylatynyn aitty.
Osy kezde qoǵam qairatkerleri Qazybek Isa, Aýyt Muqibek ministrlikte qurylatyn Keńeske múshelikke eldiń betke ustar azamattaryn, shetelderde turyp jatqan tulǵaly azamattardyń esimderin kirgizýdi surady.
«Sebebi, qazaq mədenieti men tarihyna qatysty altyn qazynanyń qomaqty bóligi osy eki elde. Al, TMD quramyndaǵy elderdiń mədeniet t.b. saladaǵy jaǵdaidy ministrlik jasaǵan tizimdegi tulǵalar tolyq biledi. Jáne bir aitarym Təýelsizdik jyldary oralǵan qandastarymyzdyń, əsirese, jastardyń ómirin arqaý etken qysqa metrajdy bolsa da kino túsirilse»,-degen usynys aitty Aýyt Muqibek.
Ministr óz kezeginde Aýyt Muqibektiń usynysyn quptap, qabyldady.
Jinalysqa qatysyp otyrǵan «Qazaqfilm» basshysy Arman Əsenov myrza jaqsy stsenarii usynylsa, máseleniń oń sheshimin tabatynyn jetkizdi.
Jýyrda ǵana «Saryarqa Aqparat» JShS-niń direktory qyzmetine taǵaiyndalǵan Oljas Berkinbaev Mádeniet jáne sport ministri Aqtoty Raiymqulovamen ótken jiyn barysynda qazaq tiliniń tamyryna qan júgirtý maqsatynda shetelde turatyn qazaq balalary arasynda, diplomattar arasynda qazaq tilinen olimpiada ótkizilse degen usynys aitty. Bul usynys ta ministr tarapynan qoldaý tapty.
Ulttyq keńes músheleri Joshy han kesenesi turǵan Ulytaýdy halyqaralyq týrizm mekenine ainaldyrý baǵytynda atqarylyp jatqan jumystar týraly da saýal tastady.
Qazaqstandy álemge tanytýdyń bir joly elimizdegi týrizmdi damytý. Kúni keshe ǵana el astanasynda Dúniejúzilik týrizm uiymynyń bastamasymen halyqaralyq sammit ótti. Ministr osy uiymnyń basshysymen kezdesip ortaq máselelerdi talqylaǵanyn aitty.
«Eldegi týrizmdi qoldap sol arqyly qazaqstandy álemge tanytý týraly Elbasy únemi aityp keledi. Qazirgi tańda Ulytaýda sapar ortalyǵy qurylysy júrip jatyr. Sonymen qatar Ál Farabidiń 1150 jyldyǵy, Altyn ordanyń 750 jyldyǵy ministrliktiń alda atqarylatyn keshendi josparynda tur», dedi A.Raiymqulova.
Kezdesý sońynda aitylǵan oi-pikir, usynystardy qorytyndylai kele QR Mádeniet jáne sport ministri alqaly basqosýǵa qatysýshylarǵa alǵys aityp aldaǵy ýaqyttarda da osyndai otyrystar turaqty túrde ótkizilip turatynyn jetkizdi.
