Búgin Mádeniet jáne sport ministri Aqtoty Raiymqulova Ulttyq qoǵamdyq senim keńesiniń múshelerimen onlain formatta kezdesý ótkizdi. Bul jaiynda Feisbýk paraqshasynda Prezident kómekshisi Erlan Qarin málim etti.
«Kezdesý aiasynda ministr biyl ótkizilgen negizgi mádeni, sporttyq is-sharalar men ǵylymi konferentsiialarǵa toqtaldy. Sondai-aq, Aqtoty Raiymqulova mádeniet, sport jáne saýyqtyrý nysandarynyń qurylysy men jóndeý jumystaryna, múmkindigi shekteýli jandar úshin túrli sport túrlerin damytý boiynsha memlekettik qoldaý sharalarynyń iske asýyna nazar aýdardy», - dep jazdy Qarin.
Sonymen qatar, ministr Ulttyq keńes alańynda aitylǵan oiyn biznesin retteýge jáne «Oqityn ult» jobasyn júzege asyrýǵa qatysty Memleket basshysy tapsyrmalarynyń oryndalý retimen tanystyrdy.
«Ministr baiandamasynan keiin kezdesý suraq-jaýap formatynda jalǵasty. Ulttyq keńes músheleri Ashat Sadyrbai, Jemis Turmaǵambetova, Tatiana Talaeva, Qaisar Tursynqoja, Bórihan Nurmuhamedov, Qazybek Isa, Aigúl Orynbek, Aidos Sarym, Marat Báshimov jáne Maksim Rojin túrli mereitoilyq is-sharalardy ótkizý jáne mádeni murany nasihattaý, tarihi-mádeni eskertkishterdi saqtaý, ádebiet jáne baspa salasyn damytý, jappai jáne kásibi sportty qoldaý boiynsha óz suraqtaryn qoidy. Kezdesý sońynda qatysýshylar talqylanǵan máseleler men usynystardy birlesip pysyqtaýǵa kelisti» dep túiindedi sózin Prezident kómekshisi.
