Mádeniet jáne sport ministri Aqtoty Raiymqulova 2020 jyly Tokioda ótetin 32-shi Jazǵy Olimpiada oiyndaryna daiyndyq qalai júrip jatqanyn jetkizdi, dep habarlaidy QazAqparat.
«Japoniia astanasy – Tokioda ótetin 32-shi jazǵy Olimpiada oiyndaryna bir jyldan az ýaqyt qaldy. Olimpiadaǵa daiyndyq belsendi túrde júrip jatyr. Osy jyl kóleminde Ulttyq quramalar 28 litsenziialyq Álem chempionatyna, 19 Aziia chempionatyna jáne birneshe álemdik irikteý týrnirine qatysýdy josparlap otyr. Olarda Tokioda ótetin Olimpiada oiyndaryna qatysý kvotalary beriledi.
2020 jyly 3 álem chempionatyna, 19 Aziia, 18 álemdik irikteý týrnirine qatysý kózdelip otyr. Olimpiada bastalǵanǵa deiin qazaqstandyq sportshylar litsenziialyq jáne reitingtik upailardy jeńip alý úshin elýden astam álem kýboktarynda baq synaidy, nátijeleri boiynsha Olimpiada oiyndaryna qatysýshylar anyqtalady», - dedi Aqtoty Raiymqulova OKQ-da ótken baspasóz máslihatynda.
Ministrdiń aitýyna qaraǵanda, josparlanǵan starttardyń nátijeleri boiynsha 2016 jylǵy Olimpiadaǵydai litsenziialar sanyn jeńip alý mindetteri qoiylyp otyr.
«Sportshylarymyzdyń halyqaralyq arenalar men Olimpiada oiyndarynan oljaly oralýlaryna tilektespiz», - dedi ol.
Al Dene shynyqtyrý jáne sport komitetiniń tóraǵasy Serik Sápievtiń sózine qulaq assaq, qazirdiń ózinde qazaqstandyq sportshylardyń qorjynynda sporttyń 6 túri boiynsha 10 litsenziia bar.
«Litsenziia alǵandardyń qatarynda Olga Rypakova, Dmitrii Balandin, Georgii Sheiko, stendti atý sportynyń komandasy bar», - dedi ol.
